നെയ്യാറ്റിന്‍കര: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിക്കാന്‍ ഒത്താശയും സഹായവും ചെയ്ത യുവാവിനെ നെയ്യാറ്റിന്‍കര പൊലിസ് അറസ്റ്റ് ചെയ്തു.
 കോട്ടുകാല്‍കോണം മണ്ണാംകല്ല് തേരിവിള പുത്തന്‍വീട്ടില്‍ സുകുമാരന്റെ മകന്‍ വിജുവിനെയാണ് നെയ്യാറ്റിന്‍കര സി.ഐയും സംഘവും അറസ്റ്റ് ചെയ്തത്.
രണ്ട് കുട്ടികളുടെ പിതാവും പെണ്‍കുട്ടിയെ പീഡിപ്പിച്ച പ്രതിയുമായ കൊടങ്ങാവിള റെസ്റ്റിന്‍ദാസ് (45) ഇന്നലെ കോടതിയില്‍ കീഴടങ്ങുകയുണ്ടായി. അവണാകുഴി സ്വദേശിയായ പത്താംക്ലാസുകാരിയെയാണ് ഇയാള്‍ പീഡിപ്പിച്ചത്. ഓട്ടോയില്‍ കുട്ടിയെ സ്‌കൂളിലേക്ക് കൊണ്ടു പോകുന്നതിനിടെയായിരുന്നു പീഡനമെന്നും കൂടാതെ തമിഴ്‌നാട്ടിലെ രഹസ്യ കേന്ദ്രത്തില്‍ വച്ച് പീഡിപ്പിച്ചതായും പൊലിസ് പറഞ്ഞു.
ദേഹാസ്വാസ്ഥ്യം അനുഭവപ്പെട്ടതിനെത്തുടര്‍ന്ന് കുട്ടിയെ ആശുപത്രിയിലെത്തിച്ച് പരിശോധിച്ചപ്പോഴാണ് പീഡനവിവരം പുറത്തറിഞ്ഞത്. പ്രതിയെ കസ്റ്റഡിയില്‍ വാങ്ങി തെളിവെടുപ്പ് നടത്തുമെന്നും പൊലിസ് അറിയിച്ചു. പ്രതികള്‍ ഉപയോഗിച്ച ഓട്ടോ പൊലിസ് കസ്റ്റഡിയിലെടുത്തു.