സ്വിറ്റ്‌സര്‍ലന്‍ഡ്: ഫിഫ അഴിമതിയുമായി ബന്ധപ്പെട്ട കൂടുതല്‍ പുറത്ത്. അഴിമതിയുമായി ബന്ധപ്പെട്ട് മൈക്കല്‍ ഗാര്‍ഷ്യ നല്‍കിയ റിപ്പോര്‍ട്ടില്‍ നടപടിയെടുക്കുന്നതില്‍ ഫിഫ വീഴ്ച്ചവരുത്തിയെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

ലോകകപ്പ് ആതിഥേത്വവുമായി ബന്ധപ്പെട്ടും അഴിമതി നടന്നെന്നാണ് ഗാര്‍ഷ്യയുടെ റിപ്പോര്‍ട്ടുള്ളത്. 2018, 2022 ലോകകപ്പുകളുടെ ആതിഥേത്വത്തിലാണ് കടുത്ത അഴിമതി നടന്നത്. പ്രധാനമായും ഖത്തറിന് ലോകകപ്പ് ആതിഥേയത്വം ലഭിക്കുന്നതില്‍ കടുത്ത അഴിമതി നടന്നെന്നാണ് ആരോപണം. 42 പേജുള്ള റിപ്പോര്‍ട്ടില്‍ ഫിഫ 'വെള്ളം ചേര്‍ത്തുവെന്നാണ് 'പുറത്തുവന്ന റിപ്പോര്‍ട്ടില്‍ വ്യക്തമാക്കുന്നത്. ഫിഫയുടെ റിപ്പോര്‍ട്ടില്‍ ഖത്തറിനെതിരേ നടപടി വേണ്ടെന്നായിരുന്നു ഉണ്ടായിരുന്നത്.

ആതിഥേയത്വം ലഭിക്കുന്നതിനായി ഫിഫയിലെ ഉന്നത ഉദ്യോഗസ്ഥന്റെ മകള്‍ക്ക് രണ്ടു മില്യണ്‍ കൈക്കൂലി നല്‍കിയതായും റിപ്പോര്‍ട്ടുണ്ട്. ആതിഥേയത്വം ലഭിക്കുന്ന വോട്ടെടുപ്പിന് മുന്‍പ് ഫിഫയിലെ അംഗങ്ങള്‍ റിയോ ഡി ജനീറോയില്‍ പാര്‍ട്ടിയില്‍ പങ്കെടുത്തെന്നും ഇത് ഖത്തര്‍ ഫുട്‌ബോള്‍ അസോസിയേഷന്റെ പ്രൈവറ്റ് ജെറ്റിലാണ് പോയതെന്നും സൂചിപ്പിച്ചു. ഫിഫ അംഗങ്ങളെ ആസ്പയര്‍ അക്കാദമി സ്വാധീനിച്ചെന്നും ഇവര്‍ ഈ കുരുക്കില്‍ പെട്ടെന്നും റിപ്പോര്‍ട്ടില്‍ പറയുന്നു. എന്നാല്‍ ആരോപണങ്ങള്‍ ഫിഫ എത്തിക്‌സ് കമ്മിറ്റി തള്ളി.