ഡര്‍ബി: ദക്ഷിണാഫ്രിക്കന്‍ താരം എ.ബി ഡിവില്യേഴ്‌സ് ടെസ്റ്റ് ക്രിക്കറ്റില്‍ നിന്ന് വിരമിച്ചേക്കും. ഇതുസംബന്ധിച്ച ഔദ്യോഗിക തീരുമാനം ഓഗസ്റ്റിലുണ്ടായേക്കും. ക്രിക്കറ്റ് ദക്ഷിണാഫ്രിക്ക ടെസ്റ്റില്‍ തുടരാന്‍ പറയുകയാണെങ്കില്‍ മാത്രമേ അദ്ദേഹം തീരുമാനം മാറ്റാന്‍ സാധ്യതയുള്ളൂ.
പരിമിത ഓവര്‍ ക്രിക്കറ്റ് മത്സരങ്ങളില്‍ കൂടുതല്‍ ശ്രദ്ധ കേന്ദ്രീകരിക്കുന്നതിനായി ടെസ്റ്റില്‍ നിന്ന് വിരമിക്കുകയാണെന്ന് ഡിവില്യേഴ്‌സ് ക്രിക്കറ്റ് ബോര്‍ഡിനെ അറിയിച്ചിട്ടുണ്ട്. അതേസമയം 2019വരെ ഏകദിനത്തില്‍ തുടരാന്‍ ആഗ്രഹിക്കുന്നതായും താരം വ്യക്തമാക്കിയിട്ടുണ്ട്. നിലവിലുള്ള പരിശീലകന്‍ റസ്സല്‍ ഡൊമിംഗോയുമായുള്ള ബന്ധം വഷളായതും തീരുമാനത്തിന് പിന്നിലുണ്ട്. ക്രിക്കറ്റ് ദക്ഷിണാഫ്രിക്കയോട് പുതിയ പരിശീലകനെ നിയമിക്കാനും ഡിവില്യേഴ്‌സ് ആവശ്യപ്പെട്ടിട്ടുണ്ട്.