മലപ്പുറം: സമസ്ത കേന്ദ്ര മുശാവറ അംഗവും പ്രമുഖ പണ്ഡിതനുമായിരുന്ന പൊന്മള ഫരീദ് മുസ്‌ലിയാരുടെ നാമധേയത്തിലുള്ള മികച്ച മുദരിസിനുള്ള അവാര്‍ഡ് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ക്ക്. ദര്‍സ് അധ്യാപന രംഗത്ത് തങ്ങള്‍ നല്‍കിയ മികച്ച സേവനങ്ങള്‍ മുന്‍നിര്‍ത്തിയാണ് പുരസ്‌കാരം. ഫരീദ് മുസ്‌ലിയാരുടെ ശിഷ്യരുടെ സംഘടനയായ മഊനത്തുല്‍ ഇഖ്‌വാന്‍ ഫെഡറേഷനും മര്‍കസുല്‍ ഉലമ ദര്‍സും സംയുക്തമായാണ് അവാര്‍ഡ് നല്‍കുന്നത്.
റഹ്മാനിയ്യ കടമേരി, നന്തി ദാറുസ്സലാം, പാണ്ടിക്കാട് കൊടശ്ശേരി, കൂരിയാട് കോട്ടക്കല്‍,പുതുപ്പറമ്പ് തുടങ്ങിയ സ്ഥലങ്ങളില്‍ മുദരിസായി സേവനം ചെയ്ത ജിഫ്‌രി തങ്ങള്‍ ഇപ്പോള്‍ ചെമ്മാട് ദാറുല്‍ഹുദ ഇസ്‌ലാമിക് യൂനിവേഴ്‌സിറ്റി, കുറ്റിക്കാട്ടൂര്‍ യമാനിയ്യ , മുണ്ടക്കുളം ജലാലിയ്യ , മടവൂര്‍ അശ്അരിയ്യ തുടങ്ങിയ സ്ഥാപനങ്ങളിലാണ് സേവനം ചെയ്യുന്നത്.
കാഞ്ഞങ്ങാട്, കോട്ടിക്കുളം സംയുക്ത മഹല്ല് ജമാഅത്തുകളുടെയും കാസര്‍കോട്, കോഴിക്കോട്, മലപ്പുറം ജില്ലകളില്‍ നിരവധി മഹല്ലുകളിലെയും ഖാസിയും ജംഇയ്യത്തുല്‍ മുദര്‍രിസീന്‍ സംസ്ഥാന പ്രസിഡന്റുമാണ്.
മഊനത്തുല്‍ ഇഖ്‌വാന്‍ പ്രസിഡന്റ് പാണക്കാട് ഇസ്മാഈല്‍ മുസ്‌ലിയാര്‍, സെക്രട്ടറി എ.കെ യൂസഫ് ബാഖവി, രണ്ടത്താണി മുദരിസ് മുഹമ്മദലി ബാഖവി, പൊന്മള കരീം ബാഖവി, ബശീര്‍ ബാഖവി, ഒ.സി അബ്ദുറഹ്മാന്‍ ബാഖവി മുക്കം എന്നിവരടങ്ങിയ കമ്മിറ്റിയാണ് തങ്ങളെ തെരഞ്ഞെടുത്തത്. 16ന് പൊന്മുണ്ടത്ത് നടക്കുന്ന ഫരീദ് മുസ്‌ലിയാര്‍ അനുസ്മരണ യോഗത്തില്‍ പട്ടിക്കാട് ജാമിഅ മുദരിസ് കോട്ടുമല മൊയ്തീന്‍കുട്ടി മുസ്‌ലിയാര്‍ അവാര്‍ഡ് നല്‍കും.