കൊണ്ടോട്ടി: കണ്ണൂരില്‍ നടന്ന സംസ്ഥാന സ്‌കൂള്‍ റസലിങ് ചാംപ്യന്‍ഷിപ്പില്‍ ഒളവട്ടൂര്‍ യതീംഖാന സ്‌കൂളിന് ഇരട്ട സ്വര്‍ണ നേട്ടം. സീനിയര്‍ ആണ്‍ കുട്ടികളുടെ 57 കിലോഗ്രാം താഴെ വിഭാഗത്തില്‍ പത്താം ക്ലാസ് വിദ്യാര്‍ഥി പി. മുഹമ്മദ് രിഫാന്‍ സ്വര്‍ണമെഡല്‍ നേടി. ഒളവട്ടൂര്‍ വെളുത്തപ്പറമ്പ് പി. അബ്ദുല്‍ സലീം, റസിയ എന്നിവരുടെ മകനാണ് റിഫാന്‍.
കഴിഞ്ഞ വര്‍ഷം പൂനെയില്‍ നടന്ന നാഷനല്‍ അമേച്വര്‍ റെസ്‌ലിങ് ചാംപ്യന്‍ഷിപ്പില്‍ കേരളത്തെ പ്രതിനിധീകരിച്ച് പങ്കെടുത്തിട്ടുണ്ട്. സീനിയര്‍ പെണ്‍കുട്ടികളുടെ 62 കിലോഗ്രാമിന് താഴെ വിഭാഗത്തിലാണ് ഒന്‍പതാം ക്ലാസ് വിദ്യാര്‍ഥിനി ഷബാനു ജെബിന്‍ സുവര്‍ണ നേട്ടം കൈവരിച്ചത്. വെട്ടുകാട് സ്വദേശി കെ.സി മൂസക്കുട്ടി, റജീന ദമ്പതികളുടെ മകളാണ്. ഇരുവരും ഹരിയാനയില്‍ നടക്കുന്ന ദേശീയ സ്‌കൂള്‍ റസ്‌ലിങ്ങ് ചാംപ്യന്‍ഷിപ്പില്‍ പങ്കെടുക്കുന്നതിനുള്ള തയാറെടുപ്പിലാണ്. സിദ്ദീഖ് അലി ഊര്‍ക്കടവ്, സ്‌കൂളിലെ കായികാധ്യാപകന്‍ ടി.പി അബ്ദുല്‍ ഗഫൂര്‍ എന്നിവരുടെ കീഴിലാണ് ഇവര്‍ പരിശീലനം നേടിയത്.