പാലക്കാട്: കെഎസ്ആര്‍ടിസി ബസ് മോഷ്ടിച്ച കേസില്‍ പ്രധാന പ്രതിയെ ടൗണ്‍ സൗത്ത് പൊലിസ് അറസ്റ്റ് ചെയ്തു. മേപ്പറമ്പ് സ്വദേശി ഫാസിലാണ് പിടിയിലായത്. ഇയാളെ ഇന്ന് വൈകിട്ട് തെളിവെടുപ്പിനായി സംഭവസ്ഥലങ്ങളില്‍ എത്തിക്കുമെന്ന് പൊലിസ് അറിയിച്ചു.

കഴിഞ്ഞ ഞായറാഴ്ച പുലര്‍ച്ചെയാണ് പാലക്കാട് കെഎസ്ആര്‍ടിസി ഡിപ്പോയില്‍ നിന്ന് ബസ് മോഷ്ടിക്കാന്‍ ശ്രമം നടന്നത്. ഡിപ്പോയ്ക്ക് പുറത്തുള്ള പ്രധാന റോഡരികില്‍ പാര്‍ക്ക് ചെയ്തിരുന്ന കെഎസ്ആര്‍ടിസിയുടെ ഓര്‍ഡിനറി ബസാണ് പ്രതി സ്റ്റാര്‍ട്ട് ചെയ്ത് കൊണ്ടുപോയത്.

ALSO READ: ട്രെക്കിങ്ങിനിടെ യുവാവിന്റെ മരണം; പ്രതിശ്രുതവധുവും കാമുകനും ചേര്‍ന്ന് നടത്തിയ കൊലപാതകമെന്ന് പൊലിസ് 

പുലര്‍ച്ചെ അഞ്ച് മണിയോടെയാണ് ഡ്യൂട്ടിയിലുണ്ടായിരുന്ന ജീവനക്കാര്‍ തങ്ങളുടെ ഷെഡ്യൂള്‍ ബസ് നിര്‍ത്തിയിട്ടിരുന്ന സ്ഥലത്ത് കാണാനില്ലെന്ന് തിരിച്ചറിഞ്ഞത്. ബസ് മോഷണം പോയെന്ന് മനസിലായതോടെ കെഎസ്ആര്‍ടിസി ജീവനക്കാര്‍ മറ്റ് വാഹനങ്ങളില്‍ ബസിനെ പിന്തുടര്‍ന്നു.

ജീവനക്കാര്‍ പിന്നാലെയുണ്ടെന്ന് മനസിലാക്കിയ പ്രതി പിടിയിലാകുമെന്ന ഭയത്തില്‍ നഗരത്തിലെ മംഗളം ടവറിന് സമീപം റോഡരികില്‍ ബസ് ഉപേക്ഷിച്ച് രക്ഷപ്പെടുകയായിരുന്നു. തുടര്‍ന്ന് നടത്തിയ അന്വേഷണത്തിലാണ് പ്രതിയെ പൊലിസ് തിരിച്ചറിഞ്ഞ് അറസ്റ്റ് ചെയ്തത്.

പ്രതി ബസ് മോഷ്ടിക്കാന്‍ മുന്‍കൂട്ടി പദ്ധതിയിട്ടിരുന്നോ, അല്ലെങ്കില്‍ മറ്റേതെങ്കിലും ലക്ഷ്യത്തോടെയാണോ ബസ് എടുത്തുപോയതെന്നതടക്കമുള്ള കാര്യങ്ങള്‍ പൊലിസ് അന്വേഷിച്ചുവരികയാണ്. ഡിപ്പോ പരിസരത്തെയും ബസ് ഉപേക്ഷിച്ച സ്ഥലത്തിന്റെയും സിസിടിവി ദൃശ്യങ്ങള്‍ കേന്ദ്രീകരിച്ചായിരുന്നു അന്വേഷണം.

സംഭവവുമായി ബന്ധപ്പെട്ട കൂടുതല്‍ വിവരങ്ങള്‍ കണ്ടെത്തുന്നതിനായി പ്രതിയെ ചോദ്യം ചെയ്യുന്നതായും കേസില്‍ വിശദമായ അന്വേഷണം തുടരുകയാണെന്നും പൊലിസ് അറിയിച്ചു.

Town South Police arrested the main accused in the KSRTC bus theft case. Fazil, a native of Meparambu, was taken into custody. Police said he will be brought to the crime scenes today evening for evidence collection.