ആലപ്പുഴ: അരൂരിലെ പരാജയത്തെപ്പറ്റി മാധ്യമങ്ങള്‍ കഥയറിയാതെ ആട്ടം കാണരുതെന്ന് പൊതുമരാമത്ത് മന്ത്രി ജി. സുധാകരന്‍.
അരൂരിലെ പരാജയം വിലയിരുത്താന്‍ ചേര്‍ന്ന സി.പി.എം ജില്ല കമ്മിറ്റി, സെക്രട്ടേറിയറ്റ് യോഗങ്ങളില്‍ മന്ത്രിക്കെതിരേ വിമര്‍ശനം ഉയര്‍ന്നുവെന്ന വാര്‍ത്തക്കെതിരേ ഫേസ്ബുക്കിലൂടെ പ്രതികരിക്കുകയായിരുന്നു മന്ത്രി.
ഏകദേശം 10 മണിക്കൂര്‍ നീണ്ട മൂന്നു തലങ്ങളിലെ പരിശോധനയില്‍ പരാജയ കാരണങ്ങള്‍ വ്യക്തമായി ആലപ്പുഴ പാര്‍ട്ടി വിലയിരുത്തിയിട്ടുണ്ട്. ഞാനും അതില്‍ സംബന്ധിച്ചിരുന്നു. അവിടെ ഉത്തരവാദപ്പെട്ട ആരും അരൂരിലെ തോല്‍വിക്ക് ഞാന്‍ കാരണക്കാരനാണെന്ന് പറഞ്ഞിട്ടില്ല. മറിച്ച് വിജയത്തിനായി എല്ലാ സഹായങ്ങളും ചെയ്ത് മുന്‍പന്തിയില്‍ പ്രവര്‍ത്തിച്ചു എന്നാണ് പറഞ്ഞത്.
എന്നാല്‍ കുട്ടനാട്ടില്‍നിന്നുള്ള ഒരു ജില്ലാകമ്മിറ്റി അംഗം ഞാനാണ് കാരണക്കാരന്‍ എന്നു മാധ്യമങ്ങളോടു പറഞ്ഞിട്ടുണ്ടെങ്കില്‍ അയാളോട് മുന്നോട്ടു വരാന്‍ ആവശ്യപ്പെടുന്നു. രാഷ്ട്രീയ ക്രിമിനലുകള്‍ പറയുന്നത് വിശ്വസിക്കരുതെന്നും മന്ത്രി വ്യക്തമാക്കി.