തിരുവനന്തപുരം: കോഴിക്കോട് പന്തീരാങ്കാവില്‍ രണ്ടു വിദ്യാര്‍ഥികളെ യു.എ.പി.എ ചുമത്തി അറസ്റ്റു ചെയ്ത സംഭവത്തില്‍ കേരളാ സര്‍ക്കാരിനെതിരേയും പൊലിസ് നടപടിക്കെതിരേയും സി.പി.എം പോളിറ്റ് ബ്യൂറോ അംഗം പ്രകാശ് കാരാട്ട് രംഗത്ത്.
ഈ കേസില്‍ പൊലിസിനു തെറ്റുപറ്റിയെന്നും ആ തെറ്റ് സര്‍ക്കാര്‍ തിരുത്തണമെന്നുമാണ് കാരാട്ട് ആവശ്യപ്പെട്ടിരിക്കുന്നത്. പന്തീരാങ്കാവ് കേസിലെ യു.എ.പി.എ ഒഴിവാക്കണമെന്നും കാരാട്ട് ആവശ്യപ്പെട്ടു.

ഇതോടെ മുഖ്യമന്ത്രി പിണറായി വിജയനും ഡി.ജി.പിയും നടത്തുന്ന പൊലിസിനെ ന്യായീകരിക്കാനുള്ള ശ്രമങ്ങളെല്ലാം പാഴ് വേലയായി മാറുകയാണ്.
ഈ കേസില്‍ പൊലിസ് തെറ്റായാണ് റിപ്പോര്‍ട്ട് നല്‍കിയിരിക്കുന്നത്. ഇതിന്റെ ഭാഗമായാണ് യു.എ.പി.എ ചുമത്തിയിരിക്കുന്നത്. ഇതുതെറ്റായ നടപടിയാണ്. അതു തിരുത്തേണ്ടത് സര്‍ക്കാരാണ്. യു.എ.പി.എ ചുമത്തുന്നതിനോട് സി.പി.എം എതിരാണ്. ലഘുലേഖകളും പുസ്തകങ്ങളും കണ്ടെത്തുന്നതല്ല യു.എ.പി.എ ചുമത്തുന്നതിനുള്ള മാനദ്ണ്ഡമെന്നും പ്രകാശ് കാരാട്ട് കേരളത്തിലെ സി.പി.എം നേതൃത്വത്തിലുള്ള സര്‍ക്കാരിന് മുന്നറിയിപ്പ് നല്‍കി.

അതേ സമയം മാവോയിസ്റ്റ് ആകുന്നത് കുറ്റകരമല്ലെന്ന ഹൈക്കോടതി ഉത്തരവിനെതിരെ സുപ്രിം കോടതിയെ സമീപിച്ച സര്‍ക്കാര്‍ നടപടിയെ രൂക്ഷമായി വിമര്‍ശിച്ച് സര്‍ക്കാരിലെ പ്രധാനകക്ഷിയായ സി.പി.ഐ തന്നെ രംഗത്തുവന്നു. മാവോയിസ്റ്റ് നിലപാടില്‍ സര്‍ക്കാരിന് തെറ്റ് പറ്റിയെന്ന് സി.പി.ഐ അസിസ്റ്റന്റ് സെക്രട്ടറി കെ പ്രകാശ് ബാബു വീണ്ടും ആവര്‍ത്തിച്ചു.

മാവോയിസത്തിനെതിരെ സുപ്രിം കോടതിയില്‍ അപ്പീല്‍ നല്‍കിയത് ശരിയായില്ല. സര്‍ക്കാരിന് അബദ്ധം പറ്റിയെങ്കില്‍ തിരുത്തണം. മാവോയിസ്റ്റ് വിഷയത്തില്‍ സര്‍ക്കാര്‍ എടുത്ത നിലപാട് ഇടത് നിലപാടിന് വിരുദ്ധമാണ്. സുപ്രിം കോടതിയിലെ ഹരജി തിരുത്തുകയോ പിന്‍വലിക്കുകയോ വേണമെന്നുമാണ് സി.പി.ഐ ആവശ്യപ്പെടുന്നത്.

അപ്പോള്‍ ആര്‍ക്കുവേണ്ടിയാണ് ഈ കേസുകളെന്നും ഈ സര്‍ക്കാര്‍ ആര്‍ക്കൊപ്പമാണെന്നുമുള്ള സംശയങ്ങളാണ് സാധാരണക്കാര്‍ക്കുണ്ടാകുന്നത്. സി.പി.എമ്മിന്റെ നയനിലപാടുകളല്ലെന്ന് പാര്‍ട്ടിയിലെ മുതിര്‍ന്ന നേതാവും മുന്‍ ദേശീയ സെക്രട്ടറിയുമായ പ്രകാശ് കാരാട്ട് തന്നെ ചൂണ്ടിക്കാട്ടുന്നു.
സഖ്യകക്ഷിയായ സി.പി.ഐ അതുതന്നെ പലവുരു ആവര്‍ത്തിക്കുന്നു. ബി.ജെ.പിയും ആര്‍.എസ്.എസും മാത്രമാണ് പിണറായിയുടെ പൊലിസ് നടപടിയെ സ്വാഗതം ചെയ്തിട്ടുള്ളത്. അപ്പോള്‍ ആര്‍.എസ്.എസ് അജന്‍ഡയാണോ പിണറായി സര്‍ക്കാര്‍ നടപ്പാക്കാന്‍ മത്സരിക്കുന്നതെന്ന സംശയമാണ് ഇപ്പോള്‍ ബലപ്പെടുന്നത്.