കോഴിക്കോട്: സന്തോഷ് ട്രോഫി ദക്ഷിണ മേഖല യോഗ്യതാ മത്സരത്തില്‍ ഇന്ന് ജീവന്‍മരണ പോരാട്ടം.
ഗ്രൂപ്പ് എയിലെ കരുത്തരായ കേരളവും തമിഴ്‌നാടും തമ്മില്‍ ഇന്ന് വൈകിട്ട് നാലിനു കോഴിക്കോട് കോര്‍പ്പറേഷന്‍ സ്റ്റേഡിയത്തില്‍ ഏറ്റുമുട്ടുമ്പോള്‍ ഇരുടീമുകള്‍ക്കും ലക്ഷ്യം ഒന്നുമാത്രം- മിസോറമില്‍ നടക്കുന്ന സീസണിലെ സന്തോഷ് ട്രോഫി ഫൈനല്‍ റൗണ്ട് പ്രവേശം.
ഇന്നത്തെ മത്സരത്തില്‍ കേരളം തമിഴ്‌നാടിനെ സമനിലയിലെങ്കിലും തളച്ചാല്‍ കേരളത്തിന് ഫൈനല്‍ റൗണ്ടിലേക്ക് മുന്നേറാം. മറിച്ച്, തമിഴ്‌നാടാണ് ജയിക്കുന്നതെങ്കില്‍ കഴിഞ്ഞ തവണത്തെ പോലെ ഇത്തവണയും കേരളത്തിന് ഫൈനല്‍ റൗണ്ട് കാണാതെ മടങ്ങാം. ആന്ധ്രാ പ്രദേശും കൂടി ഉള്‍പ്പെടുന്ന ഗ്രൂപ്പ് എയില്‍ തമിഴ്‌നാടിനും കേരളത്തിനും ഒരേ പോയിന്റുണ്ടെങ്കിലും ഗോള്‍ ശരാശരിയുടെ പിന്‍ബലത്തിലാണ് കേരളത്തിന് ഇന്ന് സമനില മാത്രം മതിയെന്ന് കണക്കുകള്‍ സൂചിപ്പിക്കുന്നത്. ആന്ധ്രയ്‌ക്കെതിരായ മത്സരത്തിലെ ജയവുമായാണ് ഇരു ടീമും പോരിനിറങ്ങുന്നത്.
ഈ രണ്ട് മത്സരങ്ങളിലും ആന്ധ്ര പരാജയപ്പെട്ടതോടെ അവര്‍ പുറത്താവുകയും ചെയ്തു. കേരളം അവരെ എതിരില്ലാത്ത അഞ്ചു ഗോളിന് പരാജയപ്പെടുത്തിയപ്പോള്‍ തമിഴ്‌നാട് 4-1നും കീഴ്‌പ്പെടുത്തി. ഇതോടെയാണ് കേരളം തമിഴ്‌നാടിനെ പിന്തള്ളി ഗ്രൂപ്പില്‍ ഒന്നാമതെത്തിയത്.
ആദ്യ മത്സരത്തില്‍ ആന്ധ്രയ്‌ക്കെതിരേ ഇറക്കിയ അതേ ടീമിനെയാണ് കോച്ച് ബിനോ ജോര്‍ജ് ഇന്നും കളത്തില്‍ വിന്യസിക്കുക. എന്നാല്‍ മത്സരത്തില്‍ പകരക്കാരനായിറങ്ങി ഇരട്ട ഗോള്‍ നേടിയ മുന്നേറ്റ താരം എമില്‍ ബെന്നിയെ ആദ്യ ഇലവനില്‍ തന്നെ ഇറക്കുമെന്നാണ് സൂചന. അതേസമയം, ആന്ധ്രയ്‌ക്കെതിരായ മത്സത്തില്‍ കാര്യമായൊന്നും ചെയ്യാനില്ലാതിരുന്ന പ്രതിരോധത്തിന് ഇന്നത്തെ മത്സരം കനക്കും.
കാരണം എതിരാളികള്‍ ശക്തരാണ്. അതില്‍ ഹാട്രിക്കടിച്ച കന്യാകുമാരിക്കാരന്‍ ലിജോയാണ് കൂടുതല്‍ അപകടകാരി. താരത്തെ കരുതിയിരിക്കാനുള്ള തന്ത്രമോതിയാണ് ബിനോ ജോര്‍ജ് കേരള താരങ്ങളെ കളത്തിലിറക്കുക. എന്നിരുന്നാലും ഇന്നത്തെ കേരളം-തമിഴ്‌നാട് യോഗ്യതാ മത്സരം ഫൈനല്‍ റൗണ്ടിലെ പ്രതീതിയുണ്ടാക്കുമെന്നു തന്നെ വിലയിരുത്താം.