പയ്യന്നൂര്‍: പയ്യന്നൂരില്‍ അരങ്ങേറിയ അക്രമ സംഭവങ്ങളില്‍ രണ്ട് ആര്‍.എസ്.എസ് പ്രവര്‍ത്തകര്‍ അറസ്റ്റില്‍. എട്ടിക്കുളം മൊട്ടക്കുന്നിലെ കെ അനില്‍കുമാര്‍(32), പി.പി രാജീവന്‍(24) എന്നിവരെയാണ് എസ്.ഐ എ.വി ദിനേശനും സംഘവും കഴിഞ്ഞ ദിവസം അറസ്റ്റ് ചെയ്തത്. ഈമാസം 11ന് രാത്രി കക്കംപാറയിലെ സി.പി.എം പ്രവര്‍ത്തകരായ ഭരതന്‍, എം ഗംഗാധരന്‍ എന്നിവരുടെ വീടുകള്‍ അക്രമിച്ച കേസിലാണ് ഇവരുടെ അറസ്റ്റ്. നേരത്തെ അറസ്റ്റിലായ ബി.ജെ.പി പ്രവര്‍ത്തകനായ മന്ദ്യന്‍ ഭാസ്‌കരനെ റിമാന്‍ഡ് ചെയ്തു. ധനരാജ് വധത്തില്‍ കൃത്യമായ ഗൂഢാലോചന നടന്നിട്ടുണ്ടെന്ന് പൊലിസ് അന്വേഷണത്തില്‍ കണ്ടെത്തി. ഗൂഢാലോചന കുറ്റം ചുമത്തി കേസില്‍ കൂടുതല്‍ പേരെ പ്രതിചേര്‍ക്കുമെന്നാണ് അന്വേഷണ സംഘം നല്‍കുന്ന സൂചന. പ്രമുഖ നേതാക്കളെ വരും ദിവസങ്ങളില്‍ ചോദ്യം ചെയ്‌തേക്കും.