ആര്‍പ്പൂക്കര: കോട്ടയം മെഡിക്കല്‍ കോളജ് കുട്ടികളുടെ ആശുപത്രിയില്‍ ചികിത്സക്കെത്തിയ ആദിവാസി നവജാതശിശുവിന് ഡോക്ടര്‍ നിര്‍ദേശിച്ച പരിശോധന അധികൃതര്‍ ഇടപെട്ട് നിഷേധിച്ചതായി ആക്ഷേപം. കഴിഞ്ഞ ദിവസം അടിമാലിയില്‍ നിന്നെത്തിയ നാലു ദിവസം പ്രായമുള്ള ആദിവാസി നവജാത ശിശുവിനു വേണ്ടി ഡോക്ടര്‍ എഴുതി നല്‍കിയ പരിശോധനകളാണ് അധികൃതര്‍ ഇടപെട്ട് നിഷേധിച്ചതെന്ന് പറയുന്നത്.
കാത്സ്യത്തിന്റെ കുറവ് മൂലമാണ് നവജാതശിശുവിനെ ആശുപത്രിയില്‍ പ്രവേശിപ്പിച്ചത്. തുടര്‍ന്ന് ബന്ധപ്പെട്ട ഡോക്ടര്‍ വൈറ്റമിന്‍ ഡിയുടെയും പാരാ തൈറോയിഡ് ഹോര്‍മോണ്‍ എന്നീ പരിശോധനകള്‍ക്ക് കുറിപ്പ് എഴുതി നല്‍കി. എന്നാല്‍ ഈ പരിശോധന ആശുപത്രി ലബോറട്ടറിയില്‍ ഇല്ലാത്തതിനാല്‍ സ്വകാര്യ ലാബില്‍ വേണം പരിശോധന നടത്താന്‍. സ്വകാര്യ ലാബില്‍ പരിശോധന നടത്തണമെങ്കില്‍ ആശുപത്രി ലാബില്‍ ഈ പരിശോധനയില്ലെന്ന് ആശുപത്രി അധികൃതര്‍ ഒപ്പിട്ട രേഖ നല്‍കണം. എന്നാല്‍ ഇത്തരത്തിലുള്ള രേഖ നല്‍കാതിരിക്കുകയും സ്വകാര്യ ലാബിലെ പരിശോധനക്ക് അനുമതി നിഷേധിക്കുകയും ചെയ്തവെന്ന് പറയുന്നു.
നവജാത ശിശുവിന്റെ രക്ത പരിശോധന സ്വകാര്യ ലാബില്‍ കൊടുക്കാന്‍ അനുമതി നിഷേധിച്ചത് സംബന്ധിച്ച് ശ്രദ്ധയില്‍പ്പെട്ടില്ലെന്നും സ്വകാര്യ സ്ഥാപനങ്ങളിലെ പരിശോധനകള്‍ക്ക് ചില നിയന്ത്രണങ്ങള്‍ ഉണ്ടെന്നും എന്‍.ആര്‍.എച്ച്.എം കോഡിനേറ്റര്‍ സുകുമാരന്‍ പറഞ്ഞു.