തിരുവനന്തപുരംമുഷ്താഖ് അലി ട്രോഫി ടി20 ക്രിക്കറ്റ് ടൂര്‍ണമെന്റില്‍ മണിപ്പൂരിനെതിരേ കേരളത്തിന് 75 റണ്‍സിന്റെ ജയം. ഗ്രീന്‍ഫീല്‍ഡ് സ്റ്റേഡിയത്തില്‍ നടന്ന മത്സരത്തില്‍ നാല് ഓവറില്‍ അഞ്ച് റണ്‍സ് വഴങ്ങി നാല് വിക്കറ്റെടുത്ത എം. മിഥുന്റെ മികവിലായിരുന്നു കേരളത്തിന്റെ ജയം. ടോസ് നഷ്ടപ്പെട്ട് ബാറ്റിങ്ങിനിറങ്ങിയ കേരളം സച്ചിന്‍ ബേബിയുടെയും (35 പന്തില്‍ 48) ക്യാപ്റ്റന്‍ റോബിന്‍ ഉത്തപ്പയുടെയും (24 പന്തില്‍ 29) വിഷ്ണു വിനോദിന്റെയും (20 പന്തില്‍ 25) മികവില്‍ ഒന്‍പത് വിക്കറ്റ് നഷ്ടത്തില്‍ 149 റണ്‍സെടുത്തു. മറുപടി ബാറ്റിങ്ങിനിറങ്ങിയ മണിപ്പൂരിന് 20 ഓവറില്‍ ഏഴ് വിക്കറ്റ് നഷ്ടത്തില്‍ 74 റണ്‍സെടുക്കാനേ കഴിഞ്ഞുള്ളൂ. മണിപ്പൂരിനായി ജോണ്‍സന്‍ സിങ് (27), ഇബോചോബ (12), അബ്ദുള്‍ കരീം (11), സിറാജ് റഹ്മാന്‍ (10) എന്നിവര്‍ പൊരുതി. കേരളത്തിനായി ജലജ് സക്‌സേനയും സച്ചിന്‍ ബേബിയും ഓരോ വിക്കറ്റെടുത്തു. മണിപ്പൂരിനായി തോമസ് സ്മിത്തും ബിശ്വോര്‍ജിത് രാജേന്ദ്രോയും മൂന്ന് വിക്കറ്റ് വീതവും ലംബാം അജയ് സിങ് രണ്ട് വിക്കറ്റും വീഴ്ത്തി.
സെന്റ് സേവിയേഴ്‌സ് കോളജ് ഗ്രൗണ്ടില്‍ നടന്ന മറ്റൊരു മത്സരത്തില്‍ ഉത്തര്‍പ്രദേശ് ത്രിപുരയെ ഏഴ് വിക്കറ്റിന് പരാജയപ്പെടുത്തി. ആറ് ഓവറായി വെട്ടിച്ചുരുക്കിയ മത്സരത്തില്‍ ആറ് വിക്കറ്റ് നഷ്ടത്തില്‍ ത്രിപുര ഉയര്‍ത്തിയ 49 റണ്‍സ് വിജയലക്ഷ്യം ഉത്തര്‍പ്രദേശ് അഞ്ചാം ഓവറിലെ രണ്ടാം പന്തില്‍ മറികടന്നു. ഗ്രീന്‍ഫീല്‍ഡ് സ്റ്റേഡിയത്തില്‍ ഉച്ചയ്ക്ക് ശേഷം നടന്ന മത്സരത്തില്‍ വിദര്‍ഭ രാജസ്ഥാനെ ഒരു റണ്‍സിന് തോല്‍പ്പിച്ചു.