തേഞ്ഞിപ്പലം: കാലിക്കറ്റ് സര്‍വകലാശാലാ കാംപസില്‍ നടക്കുന്ന ദക്ഷിണേന്ത്യാ അന്തര്‍ സര്‍വകലാശാലാ വനിതാ ഹാന്‍ഡ്ബാള്‍ ചാംപ്യന്‍ഷിപ്പില്‍ കേരളത്തിലെ മൂന്ന് സര്‍വകലാശാലകള്‍ ഇന്ന് ക്വാര്‍ട്ടര്‍ ഫൈനല്‍ മത്സരങ്ങളിലായിറങ്ങും.
കാലിക്കറ്റ്, എം.ജി, കേരള സര്‍വകലാശാലകള്‍ക്കാണ് ഇന്ന് മത്സരങ്ങള്‍. ഇന്നലെ വൈകിട്ട് നടന്ന പ്രീക്വാര്‍ട്ടര്‍ മത്സരങ്ങളില്‍ എം.ജി സര്‍വകലാശാല 24-14ന് മദ്രാസ് സര്‍വകലാശാലയെയും കേരള സര്‍വകലാശാല 18-17ന് മധുരൈ കാമരാജ് സര്‍വകലാശാലയേയും പരാജയപ്പെടുത്തി. ഇന്ന് നടക്കുന്ന ക്വാര്‍ട്ടറില്‍ എം.ജി നിലവിലെ ചാംപ്യന്‍മാരായ അണ്ണാ സര്‍വകലാശാലയേയും കേരള കഴിഞ്ഞ വര്‍ഷത്തെ മൂന്നാം സ്ഥാനക്കാരായ മൈസൂര്‍ സര്‍വകലാശാലയേയും നേരിടും.
ആദികാവി നന്നയ്യ സര്‍വകലാശാലയെ 12-10ന് പരാജയപ്പെടുത്തിയ പോണ്ടിച്ചേരി സര്‍വകലാശാലയേയാണ് ആതിഥേയരായ കാലിക്കറ്റ് സര്‍വകലാശാല നേരിടുക.