പള്ളിക്കല്‍: കാലിക്കറ്റ് സര്‍വകലാശാലാ പഠന വകുപ്പില്‍ നിന്നും പണം മോഷ്ടിക്കല്‍ പതിവാക്കിയ യുവാവ് പിടിയിലായി. ബോട്ടണി പഠന വകുപ്പില്‍ നിന്നാണ് കോഴിക്കോട് സ്വദേശിയായ യുവാവിനെ പിടികൂടിയത്. പഠന വിഭാഗത്തിലെ വിദ്യാര്‍ഥികളുടെയും അധ്യാപകരുടെയും ബാഗില്‍ നിന്നാണ് ഇയാള്‍ പണം മോഷ്ടിക്കുന്നത് പതിവാക്കിയത്. പലരുടെയും ബാഗില്‍ നിന്നായി അയ്യായിരത്തില്‍പരം രൂപയാണ് കഴിഞ്ഞ ദിവസം നഷ്ടപ്പെട്ടത്. ഇടക്കിടെ ബാഗില്‍ നിന്നും പണം കാണാതാവുന്നതായുള്ള പരാതി വിദ്യാര്‍ഥികളും അധ്യാപകരും ഉന്നയിച്ചിരുന്നു. ഇതേ തുടര്‍ന്ന് കുറച്ച് ദിവസമായി പഠന വകുപ്പില്‍ സെക്യൂരിറ്റി ജീവനക്കാരനെ നിയോഗിച്ചിരുന്നു. ഇതിനിടയിലാണ് ഇന്നലെ മോഷ്ടാവ് പിടിയിലാവുന്നത്. പണംമോഷ്ടിച്ച് രക്ഷപ്പെടുന്നതിനിടെ സെക്യൂരിറ്റി ജീവനക്കാരാണ് യുവാവിനെ പിടികൂടിയത്. യുവാവിനെ തേഞ്ഞിപ്പലം പോലീസിന് കൈമാറി. വിദ്യാര്‍ഥികള്‍ സെമിനാറുകള്‍ക്കും പഠനവുമായി ബന്ധപ്പെട്ട ആവശ്യങ്ങള്‍ക്കും പോവുമ്പോഴാണ് ക്ലാസുകളിലെത്തി ഇയാള്‍ പണം കവരുന്നത്.