തൃശ്ശൂര്‍: തന്റെ പക്കലുണ്ടായിരുന്ന സര്‍ട്ടിഫിക്കറ്റുകളെല്ലാം മോഷ്ടിക്കപ്പെട്ട് ഭാവി ജീവിതം തന്നെ അനിശ്ചിതത്വത്തിലായ വിഷ്ണുപ്രസാദിന് ഒടുവില്‍ എല്ലാം തിരികേ ലഭിച്ചു. ജര്‍മന്‍ കപ്പലില്‍ ലഭിച്ച ജോലിക്കായി ഒറിജിനില്‍ സര്‍ട്ടിഫിക്കറ്റ് ഹാജരാക്കാന്‍ പോകുന്ന വഴിക്കാണ് ഗൂഡല്ലൂര്‍ സ്വദേശിയായ വിഷ്ണുവിന്റെ ബാഗ് ആരോ മോഷ്ടിച്ചത്. തൃശ്ശൂര്‍ റയില്‍വേ സ്‌റ്റേഷനില്‍ വച്ചായിരുന്നു സംഭവം.

സര്‍ട്ടിഫിക്കറ്റുകള്‍ നഷ്ടമായെന്നും അത് തിരികേ ലഭിക്കാന്‍ സഹായിക്കണമെന്നുമുള്ള വിഷ്ണുവിന്റെ അഭ്യര്‍ഥന സമൂഹമാധ്യമങ്ങളിലൂടെ വ്യാപകമായി പ്രചരിച്ചിരുന്നു. തുടര്‍ന്ന് ഇന്ന് തൃശ്ശൂര്‍ വടക്കുംനാഥ ക്ഷേത്രത്തിന് സമീപത്തു നിന്ന് സര്‍ട്ടിഫിക്കറ്റുകളടങ്ങിയ ഫയല്‍ തിരികേ ലഭിക്കുകയായിരുന്നു. വിഷ്ണുവിന്റെ സഹായാഭ്യര്‍ഥന കണ്ട തളിക്കുളം സ്വദേശി ഷാഹിദ്, സുഹൃത്ത് പത്താങ്കല്‍ സ്വദേശി ഇമ്രാന്‍ എന്നിവര്‍ക്കാണ് ഫയല്‍ ലഭിച്ചത്.

തുടര്‍ന്ന് ഇവര്‍ സമീപത്തെ പൊലിസ് സ്റ്റേഷനില്‍ അറിയിക്കുകയായിരുന്നു. സര്‍ട്ടിഫിക്കറ്റുകളും പാസ്‌പോര്‍ട്ട് ഉള്‍പ്പെടെയുള്ള രേഖകളുമാണ് ഇതിലുണ്ടായിരുന്നതെങ്കിലും തിരിച്ചറിയില്‍ കാര്‍ഡുകളും ഏതാനും യോഗ്യതാ സര്‍ട്ടിഫിക്കറ്റുകളും ഇനിയും കിട്ടാനുണ്ട്.