മുംബൈ: മഹാരാഷ്ട്രയിലെ സഖ്യ രൂപീകരണത്തിനുള്ള നീക്കങ്ങള്‍ ദ്രുതഗതിയില്‍. ഇന്ന് നടത്താനിരുന്ന എന്‍.സി.പി അധ്യക്ഷന്‍ ശരത് പവാര്‍- കോണ്‍ഗ്രസ് അധ്യക്ഷ സോണിയാ ഗന്ധി കൂടിക്കാഴ്ച തിങ്കളാഴ്ചത്തേക്ക് മാറ്റി. എന്നാല്‍ എന്‍.സി.പി എം.എല്‍.എമാര്‍ ഇന്ന് പൂനെയില്‍ രോഗം ചേരും.

സഖ്യ രൂപീകരണത്തിന് മുന്‍പായി ഒരു പൊതുമിനിമം പരിപാടിക്ക് കോണ്‍ഗ്രസും എന്‍.സി.പിയും രൂപം നല്‍കിയിട്ടുണ്ട. ഇതേ കുറിച്ച് ശിവസേനയുമായി നടത്തുന്ന യോഗത്തില്‍ ചര്‍ച്ച ചെയ്യും. അധികാര പങ്കാളിത്തമടക്കമുള്ള കാര്യങ്ങളില്‍ അന്തിമ രൂപം നല്‍കിയ ശേഷം മുന്നണി പ്രഖ്യാപനം നടത്താനാണ് കോണ്‍ഗ്രസ്എന്‍.സി.പിശിവസേന ധാരണ.

അതേസമയം, സര്‍ക്കാര്‍ രൂപീകരിക്കാന്‍ ശിവസേനയും എന്‍.സി.പിയും കോണ്‍ഗ്രസും തമ്മില്‍ അനൗദ്യോഗിക ചര്‍ച്ചകള്‍ തുടരുകയാണ്. സഖ്യ രൂപീകരണത്തിന് മുന്നോടിയായി ശിവസേന പൂര്‍ണമായും എന്‍.ഡി.എ സഖ്യം വിട്ടു. പാര്‍ട്ടി എം.പിമാര്‍ വരുന്ന പാര്‍ലമെന്റ് ശീതകാല സമ്മേളനത്തില്‍ പ്രതിപക്ഷത്ത് ഇരിക്കും. കോര്‍പ്പറേഷനുകളില്‍ നിന്നും മറ്റ് തദ്ദേശ സ്വയം ഭരണ സ്ഥാപനങ്ങളില്‍ നിന്നും വിട്ടുനില്‍ക്കാനും ധാരണയായിട്ടുണ്ട്. അധികാര പങ്കാളിത്തം എങ്ങനെ വേണമെന്നതിന് അന്തിമ രൂപം നല്‍കാനാണ് നിലവിലെ കൂടിക്കാഴ്ചകള്‍.

ശിവസേനക്ക് അഞ്ച് വര്‍ഷം മുഖ്യമന്ത്രി സ്ഥാനം നല്‍കാന്‍ എന്‍.സി.പിയും കോണ്‍ഗ്രസും തമ്മില്‍ ധാരണയായതായാണ് വിവരം. പകരം എന്‍.സി.പിക്കും കോണ്‍ഗ്രസിനും രണ്ട് ഉപമുഖ്യമന്ത്രിമാരും മറ്റ് സുപ്രധാന വകുപ്പുകളും നല്‍കിയേക്കും. മറ്റ് പൊതു മിനിമം പരിപാടിക്ക് രൂപം നല്‍കി വരികയാണ്.