ലണ്ടന്‍: റയല്‍ മാഡ്രിഡും യുവന്റസും ഉള്‍പ്പെടെ ഏഴു ടീമുകള്‍ യുവേഫ ചാംപ്യന്‍സ് ലീഗിന്റെ പ്രീക്വാര്‍ട്ടറില്‍ പ്രവേശിച്ചു. മാഞ്ചസ്റ്റര്‍ സിറ്റി, ബയേണ്‍ മ്യൂണിക്, മാഞ്ചസ്റ്റര്‍ യുനൈറ്റഡ്, എ.എസ് റോമ, അയാക്‌സ് എന്നിവയാണ് പ്രീക്വാര്‍ട്ടറില്‍ പ്രവേശിച്ച മറ്റു ടീമുകള്‍.
ഗ്രൂപ്പ് ഘട്ടത്തില്‍ ഒരു റൗണ്ട് മത്സരം കൂടി ബാക്കി നില്‍ക്കെയാണ് ഏഴു ടീമുകള്‍ പ്രീക്വാര്‍ട്ടര്‍ ബര്‍ത്ത് ഉറപ്പിച്ചത്. കഴിഞ്ഞ ദിവസം നടന്ന മത്സരത്തില്‍ ഗ്രൂപ്പ് ജിയില്‍ റയല്‍ മാഡ്രിഡ് എതിരില്ലാത്ത രണ്ട് ഗോളുകള്‍ക്ക് എ.എസ് റോമയെ പരാജയപ്പെടുത്തി. റയലിന് വേണ്ടി 47-ാം മിനുട്ടില്‍ ഗരത് ബെയിലും 59-ാം മിനുട്ടില്‍ ലുകാസ് വാസ്‌ക്വസുമാണ് ഗോളുകള്‍ നേടിയത്. ജയത്തോടെ റയല്‍ 12 പോയിന്റുമായി ഗ്രൂപ്പില്‍ ഒന്നാം സ്ഥാനത്തെത്തി. ഒന്‍പത് പോയിന്റുള്ള റോമയാണ് രണ്ടാം റൗണ്ടില്‍. ഗ്രൂപ്പ് ജിയിലെ മറ്റൊരു മത്സരത്തില്‍ പ്ലസന്‍ 2-1 എന്ന സ്‌കോറിന് സി.എസ്.കെ.എ മോസ്‌കോയെ പരാജയപ്പെടുത്തി. ഗ്രൂപ്പ് ഇയില്‍ നടന്ന മത്സരത്തില്‍ എതിരില്ലാത്ത രണ്ട് ഗോളുകള്‍ക്ക് അയാക്‌സ് എ.ഇ.കെയെ പരാജയപ്പെടുത്തി. ഡൂസന്‍ ടാഡിച്ചിന്റെ ഇരട്ടഗോളിന്റെ കരുത്തിലായിരുന്നു അയാക്‌സിന്റെ ജയം. ഇതോടെ 13 വര്‍ഷത്തിന് ശേഷം ഹോളണ്ട് ക്ലബായ അയാക്‌സ് ചാംപ്യന്‍സ് ലീഗിന്റെ പ്രീക്വാര്‍ട്ടറില്‍ പ്രവേശിച്ചു.
ഗ്രൂപ്പ് എഫില്‍ ലിയോണും മാഞ്ചസ്റ്റര്‍ സിറ്റിയും തമ്മിലുള്ള മത്സരം 2-2 എന്ന സ്‌കോറിന് സമനിലയില്‍ കലാശിച്ചു. അയ്മറിക് ലപോര്‍ട്ടെ, സെര്‍ജിയോ അഗ്യൂറോ എന്നിവരാണ് സിറ്റിക്ക് വേണ്ടി ഗോള്‍ നേടിയത്. ലിയോണിന് വേണ്ടി മാക്‌സ് വെല്‍ കോര്‍ണറ്റ് ഇരട്ട ഗോള്‍ നേടി സമനില പിടിക്കുകയായിരുന്നു. ഗ്രൂപ്പ് എച്ചില്‍ യുവന്റസ് എതിരില്ലാത്ത ഒരു ഗോളിന് വലന്‍സിയയെ പരാജയപ്പെടുത്തി. 59-ാം മിനുട്ടില്‍ മാരിയോ മാന്‍സൂക്കിച്ചാണ് യുവന്റസിന് വേണ്ടി ഗോള്‍ നേടിയത്. ഗ്രൂപ്പ് എച്ചില്‍ നടന്ന മത്സരത്തില്‍ മാഞ്ചസ്റ്റര്‍ യുനൈറ്റഡ് ഒരു ഗോളിന് രക്ഷപ്പെട്ടു. യങ്‌ബോയ്‌സുമായുള്ള മത്സരത്തില്‍ 91-ാം മിനുട്ടില്‍ ഫെല്ലിനിയുടെ വകയായിരുന്നു യുനൈറ്റഡിന്റെ വിജയ ഗോള്‍.
ഗ്രൂപ്പ് ഇയിലെ മത്സരത്തില്‍ ആര്യന്‍ റോബന്റെയും റോബര്‍ട്ട് ലെവന്റോസ്‌കിയുടെയും ഇരട്ട ഗോളിന്റെ കരുത്തില്‍ ബയേണ്‍ മ്യൂണിക്ക് 5-1 എന്ന സ്‌കോറിന് ബെന്‍ഫിക്കയെ പരാജയപ്പെടുത്തി. 13, 30 മിനുട്ടുകളിലായിരുന്നു റോബന്റെ ഗോളുകള്‍ പിറന്നത്. 36, 51 മിനുട്ടുകളില്‍ ലെവന്‍ഡോസ്‌കിയും ലക്ഷ്യം കണ്ടു. 76-ാം മിനുട്ടില്‍ ഫ്രാങ്ക് റിബറിയിലൂടെ ബയേണ്‍ ഗോള്‍ പട്ടിക പൂര്‍ത്തിയാക്കി. ഗോഡ്‌സണ്‍ ഫെര്‍ണാണ്ടസാണ് ബെന്‍ഫിക്കയുടെ ആശ്വാസ ഗോള്‍ നേടിയത്. മറ്റൊരു മത്സരത്തില്‍ ഷാക്തര്‍ 3-2 എന്ന സ്‌കോറിന് ഹോഫന്‍ ഹെയിമിനെ പരാജയപ്പെടുത്തി.