കോഴിക്കോട്: മാവോയിസ്റ്റുകള്‍ക്ക് മുസ്‌ലിം തീവ്രവാദ പ്രസ്ഥാനങ്ങളാണ് പിന്തുണ നല്‍കുന്നതെന്നതിന് ആധികാരികമായ വല്ല തെളിവും ലഭിച്ചിട്ടുണ്ടെങ്കില്‍ അത് വെളിപ്പെടുത്തേണ്ടത് സി.പി.എം ജില്ലാ സെക്രട്ടറിയല്ലെന്നും ആഭ്യന്തര  മന്ത്രിയാണെന്നും വി.ടി ബല്‍റാം എം.എല്‍.എ.

അതല്ലാത്തപക്ഷം മനപൂര്‍വമായി വര്‍ഗീയ പ്രകോപനമുണ്ടാക്കാന്‍ ്ശ്രമിക്കുന്നതിന്റെ പേരില്‍ പി. മോഹനനെതിരേ കേസെടുക്കാന്‍ പൊലിസ് തയാറാകണമെന്നും അദ്ദേഹം ഫേസ്ബുക്ക് കുറിപ്പില്‍ ആവശ്യപ്പെട്ടു.

നേരത്തെ ഒരു ജനകീയ സമരത്തിലെ മുസ്‌ലിം സാന്നിധ്യത്തെക്കുറിച്ച് ഏഴാം നൂറ്റാണ്ടിലെ പ്രാകൃതബോധമെന്ന് ആക്ഷേപിച്ച അതേ കോഴിക്കോട്ടെ സി.പി.എം തന്നെയാണ് ഇപ്പോള്‍ സ്വന്തം പാര്‍ട്ടിയിലെ മുസ്‌ലിം നാമധാരികളായ രണ്ട് വിദ്യാര്‍ഥികളെ യു.എ.പി.എ നിയമമുപയോഗിച്ച് ജയിലിലിട്ട വിഷയത്തിലും ഇസ് ലാമിക തീവ്രവാദമെന്ന ചാപ്പയുമായി ഇറങ്ങിയിട്ടുള്ളതെന്നും അദ്ദേഹം ചൂണ്ടിക്കാട്ടി.

 പി. മോഹനന്റെ പ്രസ്താവനയെ ഹിന്ദുത്വ സംഘടകളും ഏറ്റുപിടിച്ചിരുന്നു. ഇതോടെ പ്രസ്താവനക്കെതിരേ സി.പി.എം സെക്രട്ടറി സീതാറാം യെച്ചൂരിയും സി.പി.ഐ സംസ്ഥാന സെക്രട്ടറി കാനം രാജേന്ദ്രനും  രംഗത്തെത്തിയിരുന്നു.

ഫേസ് ബുക്ക് കുറിപ്പ്

പേര് നോക്കി ചാപ്പ കുത്തുന്നതാരാണെന്ന് ഇപ്പോള്‍ വ്യക്തമായില്ലേ?

നേരത്തെ ഒരു ജനകീയ സമരത്തിലെ മുസ്ലിം സാന്നിദ്ധ്യത്തെക്കുറിച്ച് ഏഴാം നൂറ്റാണ്ടിലെ പ്രാകൃതബോധമെന്ന് ആക്ഷേപിച്ച അതേ കോഴിക്കോട്ടെ സിപിഎം തന്നെയാണ് ഇപ്പോള്‍ സ്വന്തം പാര്‍ട്ടിയിലെ മുസ്ലിം നാമധാരികളായ രണ്ട് വിദ്യാര്‍ത്ഥികളെ യുഎപിഎ നിയമമുപയോഗിച്ച് ജയിലിലിട്ട വിഷയത്തിലും ഇസ്ലാമിക തീവ്രവാദമെന്ന ചാപ്പയുമായി ഇറങ്ങിയിട്ടുള്ളത്. മാവോയിസമെന്നത് കമ്മ്യൂണിസ്റ്റ് തീവ്രവാദമാണ്. ആ ചെറുപ്പക്കാരെ ആകര്‍ഷിച്ച പ്രത്യയശാസ്ത്രവും കമ്മ്യൂണിസമാണ്. അതിന് അപകടകരമായ തരത്തില്‍ പിന്തുണ നല്‍കുന്നത് കോഴിക്കോട്ടെ ''മുസ്ലിം തീവ്രവാദ പ്രസ്ഥാനങ്ങളാ'ണെന്ന ഏതെങ്കിലും ആധികാരിക തെളിവ് ഉണ്ടെങ്കില്‍ അത് വെളിപ്പെടുത്തേണ്ടത് സിപിഎം ജില്ലാ സെക്രട്ടറിയല്ല, സംസ്ഥാന ആഭ്യന്തര വകുപ്പ് മന്ത്രിയാണ്. അങ്ങനെ തെളിവില്ല എങ്കില്‍ അനാവശ്യമായി മനപൂര്‍വ്വം വര്‍ഗീയ പ്രകോപനം ഉണ്ടാക്കുന്നതിന്റെ പേരില്‍ പി മോഹനനെതിരെ കേസെടുക്കാന്‍ പോലീസ് തയ്യാറാകണം.