കട്ടപ്പന:  തല ചായ്ക്കാനൊരു കൂരപോലുമില്ലാത്ത രാജുവിനും ഭാര്യ വിജയമ്മയ്ക്കും ജീവിതം അഗ്‌നിപരീക്ഷണമാവുകയാണ്. ഇരുവൃക്കകളും ഗുരുതരമായി തകരാറിലായ വിജയമ്മയുടെ ജീവന്‍ കാരുണ്യമുള്ളവരുടെ സഹായഹസ്തത്തിനായി കേഴുമ്പോള്‍, ഒരു നേരത്തെ ഭക്ഷണത്തിനുപോലും വകയില്ലാതെ രാജു ജീവിതത്തിനു മുമ്പില്‍ പകച്ചു നില്‍ക്കുകയാണ്. കട്ടപ്പന കല്ലുകുന്നില്‍ താമസിച്ചിരുന്ന കാഞ്ഞിരക്കാട്ട് രാജുവിനാണ് ഭാര്യയുടെ രോഗം അനിശ്ചിതമായ ജീവിതസാഹചര്യമൊരുക്കിയിരിക്കുന്നത്. ആകെയുണ്ടായിരുന്ന മൂന്നു സെന്റ് സ്ഥലവും ചെറിയ വീടും വിറ്റ് ഭാര്യയെ ചികിത്സിച്ചിട്ടും ഫലമില്ലാതെ വന്നതോടെ, ഇപ്പോള്‍ ആശുപത്രിയാണ് ഇവരുടെ വാസസ്ഥലം.
മേസ്തിരിപ്പണിക്കാരനായ രാജുവിന്റെ ഭാര്യ വിജയമ്മ(48)യുടെ രണ്ട് വൃക്കകളും തകരാറിലാണെന്ന് ആറ് മാസം മുമ്പാണ് കണ്ടെത്തിയത്. ശരീരമാസകലം നീരുവന്ന് വീര്‍ത്തതിനെ തുടര്‍ന്ന് കട്ടപ്പന താലൂക്ക് ആശുപത്രിയില്‍ പ്രവേശിപ്പിച്ചപ്പോഴാണ് രോഗവിവരം അറിയുന്നത്. വിദ്യാഭ്യാസവും ലോകപരിചയവും കുറവുള്ള വീട്ടമ്മയാണ് വിജയമ്മ. അതുകൊണ്ടുതന്നെ ശരീരത്തിനുണ്ടായ മാറ്റങ്ങള്‍ ആദ്യഘട്ടത്തിലൊന്നും മനസിലാക്കാനോ, ഡോക്ടറുടെ സഹായം തേടാനോ കഴിഞ്ഞില്ല. നേരത്തെ കൂലിപ്പണിക്കു പോയി വിജയമ്മയും തന്നാലാകുന്ന സഹായം കുടുംബത്തിന് നല്‍കിയിരുന്നു.
ഏകമകളെ നിര്‍ധന കുടുംബത്തിലാണ് വിവാഹം കഴിച്ചയച്ചത്. നാലര വര്‍ഷം മുമ്പ് ശാരീരികാസ്വസ്ഥതകളെ തുടര്‍ന്നു വിജയമ്മയെ കട്ടപ്പനയിലെ ആശുപത്രിയിലെത്തിച്ചപ്പോള്‍ ഹൃദയത്തിന് തകരാറുണ്ടെന്നു വ്യക്തമായി. വാല്‍വുകള്‍ക്ക് ഗുരുതരമായ കുഴപ്പമുണ്ടെന്നു മെഡിക്കല്‍ കോളജിലെ ഡോക്ടര്‍മാര്‍ കണ്ടെത്തുകയും ശസ്ത്രക്രിയയ്ക്കു നിര്‍ദേശിക്കുകയും ചെയ്തു. തുടര്‍ന്നാണ് വീട് വിറ്റ് ശസ്ത്രക്രിയ നടത്തിയത്. ചെറിയൊരു വാടക വീട്ടിലേക്ക് താമസം മാറ്റി. പിന്നീട് വിജയമ്മയ്ക്ക് ഡോക്ടര്‍മാര്‍ സ്ഥിരം വിശ്രമം നിര്‍ദേശിച്ചു. രാജുവിന്റെ ജോലിയില്‍നിന്നു കിട്ടുന്ന പണം ഭക്ഷണത്തിനും വീട്ടുവാടകയ്ക്കും മരുന്നിനും കൂടി തികയാതായി.
ഇതിനിടെയാണ് ഇടിത്തീ പോലെ വൃക്കരോഗം ഇവരുടെ കുടുംബത്തിലേക്ക് കടന്നു വന്നത്. പരസഹായമില്ലാതെ കിടക്കയില്‍നിന്നെഴുനേല്‍ക്കാന്‍ പോലുമാകാത്ത സ്ഥിതിയിലാണ് ഇപ്പോള്‍ വിജയമ്മ. പല ദിവസങ്ങളിലും അര്‍ധപട്ടിണിയിലാണ് ഇവര്‍ ആശുപത്രിയില്‍ കഴിച്ചുകൂട്ടുന്നത്. ആരെങ്കിലും മുന്‍കൈയെടുത്ത് ഇവരുടെ ചികിത്സയ്ക്ക് സഹായത്തിനെത്തുമെന്ന പ്രതീക്ഷ മാത്രമാണ് രാജുവിനെ നയിക്കുന്നത്. വിജയമ്മ രാജ് എന്ന പേരില്‍ സ്റ്റേറ്റ് ബാങ്ക് ഓഫ് ഇന്ത്യ കട്ടപ്പന ശാഖയില്‍ അക്കൗണ്ട് തുറന്നിട്ടുണ്ട്. അക്കൗണ്ട് നമ്പര്‍: 31737416003. ഐഎഫ്എസ്‌സി കോഡ്: എസ്ബിഐഎന്‍0005560.