ദമസ്‌കസ്: രാഷ്ട്രീയ പ്രതിസന്ധി നിലനില്‍ക്കുന്ന ഇസ്‌റാഈലില്‍ ഗസയിലെ കുരുതിക്കു പിന്നാലെ സിറിയയിലും ആക്രമണം നടത്തി. രണ്ടുപേര്‍ കൊല്ലപ്പെടുകയും നിരവധിപേര്‍ക്കു പരുക്കേല്‍ക്കുകയും ചെയ്തതായി സിറിയന്‍ ദേശീയ മാധ്യമം സന അറിയിച്ചു. ഇസ്‌റാഈലിലേക്ക് റോക്കറ്റ് ആക്രമണം നടത്തിയതിനു പ്രതികാരമായി സിറിയയിലെ ഇറാന്റെയും സിറിയന്‍ ഭരണകൂടത്തിന്റെയും സൈനികകേന്ദ്രങ്ങളെ ആക്രമിച്ചതായി ഇസ്‌റാഈലും വെളിപ്പെടുത്തി.
ഇന്നലെ പുലര്‍ച്ചെയായിരുന്നു ആക്രമണം. സാസ നഗരത്തിലെ ഒരു വീട് തകരുകയും സമീപത്തെ കെട്ടിടങ്ങള്‍ക്ക് കേടുപാടു പറ്റുകയും ചെയ്തു. അതേസമയം ദമസ്‌കസിനു നേരെ വന്ന മിസൈലുകളില്‍ ഭൂരിഭാഗവും സിറിയന്‍ സേന തകര്‍ത്തതായി സൈനികകേന്ദ്രങ്ങള്‍ അറിയിച്ചു. ആക്രമണത്തില്‍ ഇസ്‌റാഈലി യുദ്ധവിമാനങ്ങളും പങ്കെടുത്തു. ഇറാന്‍ വിപ്ലവഗാര്‍ഡിന്റെ ഖുദ്‌സ് സേനയുടെ കേന്ദ്രങ്ങളെ യുദ്ധവിമാനങ്ങളുപയോഗിച്ച് ആക്രമിച്ചതായി ഇസ്‌റാഈലി സൈനികവക്താവ് അവിച്ചെ അഡ്രയി പറഞ്ഞു. മിസൈല്‍ ആയുധകേന്ദ്രങ്ങളെയും ലക്ഷ്യംവച്ചു. ഇറാന്‍ പിന്തുണയുള്ള ഹിസ്ബുല്ലക്ക് നൂതന ആയുധങ്ങള്‍ ലഭിക്കുന്നത് തടയാനായി നൂറിലേറെ ആക്രമണം സിറിയയില്‍ നടത്തിയിട്ടുണ്ട്- വക്താവ് കൂട്ടിച്ചേര്‍ത്തു.
സിറിയയില്‍ നിന്നു വന്ന നാലു റോക്കറ്റുകളെ പ്രതിരോധ സംവിധാനം വീഴ്ത്തിയതായും സിറിയയിലെ ഇറാന്‍ കേന്ദ്രങ്ങളെ ആവശ്യമുള്ള അത്രയുംകാലം തുടര്‍ന്നും ആക്രമിക്കുമെന്നും ഇസ്‌റാഈല്‍ സൈന്യം അറിയിച്ചു. അതേസമയം ഇസ്‌റാഈല്‍ സേന സിറിയന്‍ സൈനികകേന്ദ്രങ്ങളെ ആക്രമിക്കുന്നത് അപൂര്‍വമാണെന്നും ഇതുവരെ ഇറാന്റെയോ ഇറാന്‍ സഖ്യത്തിലുള്ളവരുടെയോ കേന്ദ്രങ്ങളെയാണ് ആക്രമിച്ചിരുന്നതെന്നും അല്‍ജസീറ റിപ്പോര്‍ട്ടര്‍ പറഞ്ഞു.
ആക്രമണത്തെ കുറിച്ച് ഇറാന്‍ പ്രതികരിച്ചിട്ടില്ലെങ്കിലും സിറിയന്‍ ഭരണകൂടത്തെ പിന്തുണയ്ക്കുന്ന റഷ്യ ഇസ്‌റാഈലിന്റെ ആക്രമണത്തെ അപലപിച്ചു. ഇത് തെറ്റായ നീക്കമാണെന്നും അന്താരാഷ്ട്ര നിയമങ്ങള്‍ക്കു വിരുദ്ധമാണെന്നും റഷ്യന്‍ ഉപവിദേശകാര്യമന്ത്രി മിഖായേല്‍ ബോഗ്ദനോവ് പറഞ്ഞു.
അതേസമയം രാഷ്ട്രീയ അനിശ്ചിതാവസ്ഥ മറികടക്കാനും മറ്റു പാര്‍ട്ടികളുടെ പിന്തുണ നേടുന്നതിനും വേണ്ടിയാണ് നെതന്യാഹു ഗസയിലും സിറിയയിലും ആക്രമണം നടത്തുന്നതെന്ന് ആരോപണമുണ്ട്. ഗസയിലെ ആക്രമണത്തെ നെതന്യാഹുവിന്റെ മുഖ്യ എതിരാളിയായ ബെന്നി ഗാന്റ്‌സും സ്വാഗതം ചെയ്തിരുന്നു.