ദമസ്‌കസ്: സിറിയയിലെ ഇദ്‌ലിബില്‍ ജനവാസ ക്യാംപുകള്‍ക്ക് നേരെയുണ്ടായ മിസൈല്‍ ആക്രമണത്തില്‍ 22 സാധാരണക്കാര്‍ കൊല്ലപ്പെട്ടു. റഷ്യന്‍ പിന്തുണയുള്ള സര്‍ക്കാര്‍ സൈന്യമാണ് തുടര്‍ച്ചയായ ആക്രമണം നടത്തിയത്.
ക്വഹ് ഗ്രാമത്തിലാണ് ആക്രമണമുണ്ടായതെന്ന് സിറിയന്‍ സിവില്‍ ഡിഫന്‍സ് വക്താവ് പറഞ്ഞു. കൊല്ലപ്പെട്ടവരില്‍ പത്ത് കുട്ടികളും മൂന്ന് സ്ത്രീകളും ഉള്‍പ്പെടുമെന്ന് അദ്ദേഹം പറഞ്ഞു. സമീപത്തെ ആശുപത്രി സമീപത്ത് നിന്ന് 25 മീറ്റര്‍ അകലെ രണ്ട് മിസൈലുകള്‍ പതിച്ചെന്ന് സിറിയന്‍ അമേരിക്കന്‍ മെഡിക്കല്‍ സൊസൈറ്റി പറഞ്ഞു. ആശുപത്രിയിലെ നാല് സ്റ്റാഫുകള്‍ക്ക് ആക്രമണത്തില്‍ പരുക്കേറ്റു. വിമതരുടെ നിയന്ത്രണത്തിലുള്ള അവസാന പ്രദേശമാണിത്.
ക്വഹിലെ ആക്രമണത്തിന്റെ മണിക്കൂറുകള്‍ക്ക് മുന്‍പ് മാരിയത്ത് അല്‍ നുഅ്മാന്‍ നഗരത്തിലുണ്ടായ ആക്രമണത്തില്‍ നാല് കുട്ടികള്‍ ഉള്‍പ്പെടെ ആറ് പേര്‍ കൊല്ലപ്പെട്ടിരുന്നു. സിറിയന്‍ യുദ്ധത്തില്‍ ആശുപത്രികള്‍ക്ക് നേരെ റഷ്യയുടെ ആക്രമണത്തിനെതിരേ മനുഷ്യാവകാശ സംഘനടകള്‍ രംഗത്തെത്തിയിരുന്നു. ആശുപത്രികള്‍ക്കും സ്‌കൂളുകള്‍ക്കും നേരെ റഷ്യന്‍ സൈന്യം മനപ്പൂര്‍വം ആക്രമണം നടത്തുകയാണെന്ന് യു.എന്‍ അധികൃതര്‍ ആരോപിച്ചിരുന്നു.
സിറിയയില്‍ നാല് മാസത്തിനിടെയുണ്ടായ ആക്രമണത്തില്‍ 1000 സാധാരണക്കാര്‍ കൊല്ലപ്പെട്ടെന്നാണ് യു.എന്‍ റിപ്പോര്‍ട്ട്. ആയിരക്കണക്കിന് പേര്‍ ഇദ്‌ലിബില്‍ നിന്ന് പലായനം ചെയ്തിട്ടുണ്ട്.