ഫാറൂഖ് കോളജ്: സമൂഹവുമായി ബന്ധമില്ലാത്ത വിദ്യാഭ്യാസം വ്യര്‍ഥവും അര്‍ഥശൂന്യവുമാണെന്ന് മലയാളം സര്‍വകലാശാല വൈസ് ചാന്‍സിലര്‍ ഡോ. അനില്‍ വള്ളത്തോള്‍. ഫാറൂഖ് കോളജില്‍ സമാന ഡിപ്പാര്‍ട്ട്‌മെന്റുകളെ സമന്വയിപ്പിച്ച് നടപ്പാക്കുന്ന ഡയരക്ടറേറ്റ് ഓഫ് അക്കാദമിക്‌സിന്റെ (ഡി.ഒ.എ) ലോഞ്ചിങ് കര്‍മവും അതിന് കീഴിലെ ആറ് സ്‌കൂളുകളുടെ ഉദ്ഘാടനവും നിര്‍വഹിക്കുകയായിരുന്നു അദ്ദേഹം. ഉന്നതവിദ്യാഭ്യാസ രംഗം ജാഗ്രത പുലര്‍ത്തേണ്ട കാലമാണിത്. കലുഷമായ സാംസ്‌കാരിക കാലത്തിലൂടെയാണ് നാം മുന്നേറുന്നത്. കാപട്യമാണ് പുതിയ കാലത്തിന്റെ മുഖമുദ്രയെന്നും കാരണം അറിവില്ലായ്മയാണെന്നും അദ്ദേഹം കൂട്ടിച്ചേര്‍ത്തു.
എ.വി.ടി ഹാളില്‍ നടന്ന ചടങ്ങില്‍ ഡി.ഒ.എ ഡയരക്ടര്‍ ഡോ. എന്‍.വി സമിയ്യ അധ്യക്ഷയായി. കാലിക്കറ്റ് യൂനിവേഴ്‌സിറ്റി സയന്‍സ് ഡീന്‍ ഡോ. പി. രവീന്ദ്രന്‍ മുഖ്യപ്രഭാഷണം നടത്തി. ഡി.ഒ.എ കോഡിനേറ്റര്‍ ഡോ. കെ.എ ആയിഷ സ്വപ്ന പദ്ധതി വിശദീകരിച്ചു. പ്രിന്‍സിപ്പല്‍ ഡോ. കെ.എം നസീര്‍, മാനേജിങ് കമ്മിറ്റി പ്രസിഡന്റ് പി.കെ അഹമ്മദ്, സെക്രട്ടറി കെ.വി കുഞ്ഞഹമ്മദ് കോയ, മാനേജര്‍ സി.പി കുഞ്ഞുമുഹമ്മദ്, മുന്‍ പ്രിന്‍സിപ്പല്‍മാരായ പ്രൊഫ. എ. കുട്ട്യാലിക്കുട്ടി, പ്രൊഫ. ഇ.പി ഇമ്പിച്ചിക്കോയ എന്നിവര്‍ സംസാരിച്ചു. ഡോ. കെ. സുധീര്‍ സ്വാഗതവും ടി. മുഹമ്മദ് നിഷാദ് നന്ദിയും പറഞ്ഞു.