തിരൂര്‍: ഉണ്യാല്‍ ബീച്ച് റോഡില്‍ സി.പി.എം  പ്രവര്‍ത്തകനു വെട്ടേറ്റ സംഭവത്തില്‍ രണ്ടുപേര്‍ അറസ്റ്റില്‍. കേസിലെ രണ്ടാം പ്രതി പുതിയകടപ്പുറം പള്ളിത്താന്റെ പുരക്കല്‍ സാജിദ് (24), അഞ്ചാം പ്രതി ഉണ്യാല്‍ സ്വദേശി പള്ളീമാന്റെ പുരക്കല്‍ റാസിഖ് (25) എന്നിവരെയാണ് തിരൂര്‍ സി.ഐ ബഷീറിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
ആലിന്‍ചുവട് കടപ്പുറത്ത് ഓലഷെഡ്ഡില്‍ ഒളിവില്‍ കഴിയുകയായിരുന്ന പ്രതികളെ രഹസ്യ വിവരത്തെ തുടര്‍ന്ന് ഇന്നലെ രാവിലെ ആറോടെയാണ് കസ്റ്റഡിയിലെടുത്തത്. സംഭവത്തില്‍ ആറു പേര്‍കൂടി പിടിയിലാകാനുണ്ടെന്നു പൊലിസ് പറഞ്ഞു. എട്ടു പ്രതികളില്‍ ആറു പേരെയും തിരിച്ചറിഞ്ഞതായി തിരൂര്‍ ഡിവൈ.എസ്.പി വി.എ ഉല്ലാസ് വ്യക്തമാക്കി. ഉണ്യാലില്‍ ബുധനാഴ്ച രാവിലെ പതിനൊന്നോടെയാണ് ഉണ്യാല്‍ കിണറ്റിങ്ങല്‍ അസൈനാറിന്റെ മകന്‍ അഫ്‌സല്‍ എന്ന അക്കു (28)വിനെ വെട്ടിപ്പരുക്കേല്‍പ്പിച്ചത്. അഫ്‌സല്‍ കോഴിക്കോട്ടെ സ്വകാര്യ ആശുപത്രിയില്‍ ചികിത്സയിലാണ്.