തിരുവനന്തപുരം: ശബരിമല വിഷയത്തില്‍ പ്രതിപക്ഷ ബഹളത്തെ തുടര്‍ന്ന് ഇന്നലെയും നിയമസഭ നേരത്തേ പിരിഞ്ഞു. സഭ തുടങ്ങിയപ്പോള്‍ തന്നെ പ്ലക്കാര്‍ഡുകളും ബാനറും ഉയര്‍ത്തി പ്രതിപക്ഷാംഗങ്ങള്‍ ബഹളംവച്ചു.
ചോദ്യോത്തരവേള നിര്‍ത്തിവച്ച് അടിയന്തരപ്രമേയം ചര്‍ച്ച ചെയ്യണമെന്ന് പ്രതിപക്ഷ നേതാവ് രമേശ് ചെന്നിത്തല സ്പീക്കര്‍ പി.ശ്രീരാമകൃഷ്ണനോട് ആവശ്യപ്പെട്ടെങ്കിലും അദ്ദേഹം വഴങ്ങിയില്ല. മര്യാദയുടെയും മാന്യതയുടെയും സീമ പ്രതിപക്ഷം ലംഘിക്കുകയാണെന്നും എല്ലാദിവസവും ചോദ്യോത്തര വേള തടസപ്പെടുത്തുന്നതു ശരിയല്ലെന്നും സ്പീക്കര്‍ പറഞ്ഞു.
ചോദ്യോത്തര വേള നിര്‍ത്തിവച്ച് അടിയന്തരപ്രമേയം ചര്‍ച്ചയ്‌ക്കെടുക്കേണ്ട സാഹചര്യമില്ല. പ്രളയക്കെടുതിയില്‍ രക്ഷാപ്രവര്‍ത്തനം നടത്തിയതിന് കേന്ദ്രം കൂലി ചോദിച്ചതടക്കടക്കമുള്ള സുപ്രധാന വിഷയങ്ങള്‍ ചര്‍ച്ച ചെയാനുണ്ട്. അതിനാല്‍ പ്രതിപക്ഷം സഹകരിക്കണമെന്നും അദ്ദേഹം ആവശ്യപ്പെട്ടു. എന്നാല്‍, സ്പീക്കറുടെ ആവശ്യം ചെവിക്കൊള്ളാതെ പ്രതിപക്ഷാംഗങ്ങള്‍ പ്രതിഷേധവുമായി സ്പീക്കറുടെ ഡയസിന് മുന്നിലെത്തി. ദയവായി ചോദ്യോത്തരവേള തടസപ്പെടുത്തരുതെന്ന് സ്പീക്കര്‍ ആവശ്യപ്പെട്ടെങ്കിലും പ്രതിപക്ഷം തയാറായില്ല.
സ്പീക്കര്‍ മുന്‍വിധിയോടെ കാര്യങ്ങള്‍ പറയുകയാണെന്നും പ്രതിപക്ഷം സഹകരിക്കാത്തതുകൊണ്ടാണ് നിയമസഭ തടസപ്പെടുന്നതെന്ന വാദം തെറ്റാണെന്നും ചെന്നിത്തല വ്യക്തമാക്കി. എന്നാല്‍, പ്രതിപക്ഷത്തിന്റെ അടിയന്തരപ്രമേയം ചര്‍ച്ചയ്‌ക്കെടുക്കാന്‍ കഴിയില്ലെന്ന നിലപാടായിരുന്നു സ്പീക്കറുടേത്.
ഇതോടെ ചോദ്യോത്തരവേള റദ്ദാക്കിയ സ്പീക്കര്‍ മറ്റു നടപടിക്രമങ്ങളെല്ലാം വേഗത്തില്‍ പൂര്‍ത്തിയാക്കി 22 മിനിറ്റിനുള്ളില്‍ സഭ പിരിഞ്ഞതായി അറിയിച്ചു. ശബരിമല വിഷയത്തില്‍ ഇത് മൂന്നാംദിവസമാണ് പ്രതിപക്ഷം നിയമസഭ സ്തംഭിപ്പിക്കുന്നത്.