മലപ്പുറം: ബി.ജെ.പി പ്രഖ്യാപിച്ച അപ്രതീക്ഷിത ഹര്‍ത്താലില്‍ വലഞ്ഞു മലപ്പുറവും. ജില്ലയില്‍ ചിലയിടങ്ങളിലുണ്ടായ ചെറിയ സംഘര്‍ഷങ്ങള്‍ ഒഴിച്ചുനിര്‍ത്തിയാല്‍ ഹര്‍ത്താല്‍ സമാധാനപരമായിരുന്നു.
ശ്രീകാര്യത്ത് ആര്‍.എസ്.എസ് കാര്യവാഹിനെ വെട്ടിക്കൊന്നതില്‍ പ്രതിഷേധിച്ചു കഴിഞ്ഞ ദിവസം രാത്രി ഏറെ വൈകിയാണ് ബി.ജെ.പി ഹര്‍ത്താലിന് ആഹ്വാനം ചെയതത്. ഹര്‍ത്താല്‍ വിവരം അറിയാതെ വിവിധ ആവശ്യങ്ങള്‍ക്കായി രാവിലെയോടെ പുറത്തിറങ്ങിയവരാണ് വാഹനം കിട്ടാതെ വലഞ്ഞത്. ജില്ലാ ആസ്ഥാനത്തിനു പുറമേ മഞ്ചേരി, തിരൂര്‍, നിലമ്പൂര്‍, പൊന്നാനി തുടങ്ങിയ നഗരങ്ങളിലെല്ലാം കടകമ്പോളങ്ങള്‍ അടഞ്ഞുകിടന്നു. സ്വകാര്യ വാഹനങ്ങള്‍ ഓടിയെങ്കിലും കെ.എസ്.ആര്‍.ടി.സിയും സ്വകാര്യ ബസുകളും നിരത്തിലിറങ്ങിയില്ല.
ചിലയിടത്തു കടകളും ഹോട്ടലുകളും തുറന്നു പ്രവര്‍ത്തിച്ചു. റെയില്‍വേ സ്റ്റേഷനുകളിലും കരിപ്പൂര്‍ വിമാനത്താവളത്തിലും എത്തിയ യാത്രക്കാര്‍ വാഹനങ്ങള്‍ കിട്ടാതെ ബുദ്ധിമുട്ടി. രാവിലെ നഗരങ്ങളില്‍ പ്രകടനം നടത്തിയ ബി.ജെ.പി പ്രവര്‍ത്തകര്‍ പലയിടത്തും വാഹനങ്ങള്‍ തടഞ്ഞു. എടപ്പാളില്‍ റോഡ് ഉപരോധിച്ച ഹര്‍ത്താല്‍ അനുകൂലികള്‍ തൃശൂരില്‍നിന്നു കോഴിക്കോട്ടേക്കു പോകുകയായിരുന്ന കെ.എസ്.ആര്‍.ടി.സി ബസിനു നേരെ കല്ലെറിഞ്ഞു.
രാവിലെ ഒന്‍പതിനായിരുന്നു സംഭവം. താനൂരില്‍ ഗതാഗത തടസമുണ്ടാക്കിയതിനു കണ്ടാലറിയാവുന്ന നൂറോളം ബി.ജെ.പി പ്രവര്‍ത്തകര്‍ക്കെതിരേ പൊലിസ് കേസെടുത്തു. തിരൂരില്‍ ഹര്‍ത്താല്‍ അനുകൂലികള്‍ സി.പി.എമ്മിന്റെ ബോര്‍ഡുകള്‍ തകര്‍ത്തതു സംഘര്‍ഷത്തിനിടയാക്കി. ബൈക്കില്‍ സഞ്ചരിക്കുകയായിരുന്ന രണ്ടു പേര്‍ക്കെതിരേയും ആക്രമണമുണ്ടായി. ഇവരെ തിരൂര്‍ ജില്ലാ ആശുപത്രിയില്‍ പ്രവേശിപ്പിച്ചു.
വാഴയൂര്‍ കാരാടില്‍ വാഹനങ്ങള്‍ തടയുകയും കടകള്‍ അടപ്പിക്കുകയും ചെയ്തു. മഞ്ചേരി കുത്തുകല്ലില്‍ ഓട്ടോറിക്ഷ തടയാന്‍ ശ്രമിച്ചതിനെ തുടര്‍ന്നു ചെറിയ സംഘര്‍ഷമുണ്ടായി. സംഭവത്തില്‍ മൂന്നുപേരെ മഞ്ചേരി മെഡിക്കല്‍ കോളജില്‍ പ്രവേശിപ്പിച്ചു.