വടകര: ഹര്‍ത്താല്‍ ദിനത്തില്‍ അഴിയൂരിലുണ്ടായ സംഘര്‍ഷത്തില്‍ രണ്ടുപേര്‍ക്ക് പരുക്കേറ്റു. ലോറിയുടെ ഗ്ലാസ് എറിഞ്ഞു തകര്‍ത്തു. തലശേരിയില്‍നിന്ന് വടകരയിലേക്ക് മത്സ്യം കയറ്റി വരികയായിരുന്ന ലോറിയാണ് ആക്രമിക്കപ്പെട്ടത്. അഴിയൂര്‍ അണ്ടിക്കമ്പനിക്കടുത്ത് വച്ച് കല്ലേറുണ്ടാവുകയായിരുന്നു. സംഭവത്തില്‍ ലോറിയുടെ ഗ്ലാസ് പാടെ തകര്‍ന്നു. പരുക്കേറ്റ ഡ്രൈവര്‍ ഇരിട്ടി ഇരിണാവ് കാളിയന്‍ വളപ്പില്‍ ശമീര്‍ തലശേരി സ്വകാര്യ ആശുപത്രിയില്‍ ചികിത്സ തേടി.
ബി.ജെ.പി-എസ്.ഡി.പി.ഐ പ്രവര്‍ത്തകര്‍ തമ്മിലുണ്ടായ സംഘര്‍ഷത്തില്‍ ബി.ജെ.പി പ്രവര്‍ത്തകന് പരുക്കേറ്റു. പരവന്റവളപ്പില്‍ ജിതേഷിനാണ് പരുക്കേറ്റത്. ഇയാളെ തലശേരി ഇന്ദിരാഗാന്ധി ആശുപത്രിയില്‍ പ്രവേശിപ്പിച്ചു. എരിക്കിന്‍ചാല്‍ ഭാഗത്ത് വാഹനം തടഞ്ഞതിനെ ചൊല്ലിയുള്ള തര്‍ക്കം സംഘര്‍ഷത്തില്‍ കലാശിക്കുകയായിരുന്നു. ചോമ്പാല പൊലിസ് സ്ഥലത്തെത്തി സ്ഥിതിഗതികള്‍ നിയന്ത്രിച്ചു.