ചെന്നൈ: ഐ.എസ്.എല്ലില്‍ ചെന്നൈയിനിന്റെ ഹോം ഗ്രൗണ്ടില്‍ നടന്ന മത്സരത്തില്‍ എ.ടി.കെയോട് പരാജയപ്പെട്ട് ചെന്നൈയിന്‍. 3-2 എന്ന സ്‌കോറിനായിരുന്നു ചെന്നൈയിനിന്റെ തോല്‍വി. ഹാന്റ് ബോളില്‍നിന്ന് വിധിച്ച പെനാല്‍റ്റിയില്‍ നിന്നായിരുന്നു എ.ടി.കെയുടെ രണ്ട് ഗോളുകളും പിറന്നത്.
14-ാം മിനുട്ടില്‍ ജയേഷ് റാണയാണ് എ.ടി.കെയുടെ ആദ്യ ഗോള്‍ നേടിയത്. 24-ാം മിനുട്ടില്‍ തിയോ സിങ് ഗോള്‍ നേടിയതോടെ ചെന്നൈയിന്‍ സമനില പിടിച്ചു. എന്നാല്‍ ആദ്യ പകുതി അവസാനിക്കാന്‍ മിനുട്ടുകള്‍ മാത്രം ശേഷിക്കെ ബ്രൂണോ പെനാല്‍റ്റിയില്‍ നിന്ന് എ.ടി.കെയുടെ രണ്ടാം ഗോള്‍ നേടി.
80-ാം മിനുട്ടില്‍ എ.ടി.കെക്ക് അനുകൂലമായി വീണ്ടും പെനാല്‍റ്റി വിധിച്ചു. കിക്കെടുത്ത ബ്രൂണോ പന്ത് ലക്ഷ്യത്തിലെത്തിച്ച് ലീഗ് രണ്ടാക്കി ഉയര്‍ത്തി. 88-ാം മിനുട്ടില്‍ ഇസാക് വന്‍മല്‍സൗമ ഒരു ഗോള്‍ തിരിച്ചടിച്ച് പരാജയത്തിന്റെ ഭാരം കുറച്ചു. ജയത്തോടെ 15 പോയിന്റുമായി എ.ടി.കെ അഞ്ചാം സ്ഥാനത്തെത്തി. പത്ത് മത്സരത്തില്‍ നിന്ന് അഞ്ച് പോയിന്റുമായി ചെന്നൈയിന്‍ എട്ടാം സ്ഥാനത്ത് തുടരുന്നു.
ഇന്ന് നടക്കുന്ന മത്സരത്തില്‍ ഡല്‍ഹി ഡൈനാമോസ് മുംബൈ സിറ്റിയെ നേരിടും. പട്ടികയില്‍ അവസാന സ്ഥാനത്തുള്ള ഡല്‍ഹി ആദ്യ ജയം തേടിയാണ് ഇന്ന് ഹോം ഗ്രൗണ്ടില്‍ ഇറങ്ങുന്നത്. ഒന്‍പത് മത്സരങ്ങള്‍ പൂര്‍ത്തിയായിട്ടും ഡല്‍ഹിക്ക് ഒറ്റ ജയം പോലും സ്വന്തമാക്കാനായിട്ടില്ല. എട്ട് മത്സരത്തില്‍ നിന്ന് 14 പോയിന്റുള്ള മുംബൈ സിറ്റി പട്ടികയില്‍ ആറാം സ്ഥാനത്താണ്.