കൊച്ചി: കൊച്ചി കപ്പല്‍ശാലയുടെ ഓഹരി വിറ്റഴിച്ച് സ്വകാര്യവല്‍ക്കരിക്കാന്‍ നടത്തുന്ന കേന്ദ്ര ഗവണ്‍മെന്റ് നടപടികള്‍ക്കെതിരെ ഓഗസ്റ്റ് രണ്ടിന് ജില്ലയില്‍ കരിദിനമാചരിക്കുന്നതിന് സംയുക്ത ട്രേഡ് യൂനിയനുകളുടെ ജില്ലാ കോ-ഓര്‍ഡിനേഷന്‍ കമ്മിറ്റി തീരുമാനിച്ചു. അന്നേ ദിവസം വൈകീട്ട് നാലിന് ജില്ലയിലെ വിവിധ ട്രേഡ് യൂനിയനുകള്‍ കൊച്ചി കപ്പല്‍ശാലയിലേക്ക് മാര്‍ച്ച് നടത്താനും ഇന്നലെ ചേര്‍ന്ന സംയുക്ത സമരസമതി യോഗം തീരുമാനിച്ചു. ഐ.എന്‍.ടി.യു.സി ജില്ലാ പ്രസിഡന്റ് കെ.കെ ഇബ്രാഹിംകുട്ടിയുടെ അധ്യക്ഷതയില്‍ ചേര്‍ന്ന യോഗത്തിന് സി.ഐ.ടി.യു ജില്ലാ സെക്രട്ടറി സി.കെ മണിശങ്കര്‍ സ്വാഗതം ആശംസിച്ചു.
സി.ഐ.ടി.യു അഖിലേന്ത്യാ സെക്രട്ടറി കെ ചന്ദ്രന്‍പിള്ള, എ.ഐ.ടി.യു.സി ജില്ലാ സെക്രട്ടറി കെ.എന്‍ ഗോപി, സി.ഐ.ടി.യു സംസ്ഥാന സെക്രട്ടറി കെ.എന്‍ ഗോപിനാഥ്, അഡ്വ.ടി.ബി മിനി(ടി.യു.സി.ഐ), എം.എ ഷാജി, സെബാസ്റ്റ്യന്‍ സാബു(കെ.ടി.യു.സി(ജെ), എം ബാബുരാജ്(എച്ച്.എം.എസ്), എന്‍.ജി തോമസ്(എന്‍.എല്‍.സി), ഫാരിഷ പി.എസ്(സേവ), കെ.കെ ചന്ദ്രന്‍(എ.ഐ.സി.ടി.യു), കെ.ടി വിമലന്‍(യു.ടി.യു.സി), ജബ്ബാര്‍ പുന്നക്കാടന്‍(എസ്.ടി.യു), കെ.എം സാദത്ത്(എന്‍.എസ്.ടി.യു), എം ജീവകുമാര്‍(ഐ.എന്‍.എല്‍.സി), തുടങ്ങിയവര്‍ സംസാരിച്ചു.
കേന്ദ്ര പൊതുമേഖലയിലെ വിവിധ യൂനിയനുകളെ പ്രതിനിധീകരിച്ച് യൂനിയന്‍ നേതാക്കളും യോഗത്തില്‍ പങ്കെടുത്തു. കപ്പല്‍ശാലയുടെ ഓഹരി വില്‍പ്പനയില്‍ നിന്നും പിന്‍മാറണമെന്ന് സംയുക്ത ട്രേഡ് യൂണിയന്‍ ജില്ലാ സമിതി യോഗം കേന്ദ്ര സര്‍ക്കാരിനോടും ഷിപ്പ്‌യാര്‍ഡ് മാനേജ്‌മെന്റിനോടും ആവശ്യപ്പെട്ടു.