ബലൂചിസ്താന്‍: പാകിസ്താനിലെ ആശുപത്രിയില്‍ ഉണ്ടായ സ്‌ഫോടനത്തില്‍ 53 പേര്‍ കൊല്ലപെട്ടു. ക്വറ്റയിലെ ആശുപത്രിയിലെ എമര്‍ജന്‍സി വാര്‍ഡിന് സമീപമാണ് ബോംബ് സ്‌ഫോടനമുണ്ടായത്.

കഴിഞ്ഞ ദിവസം ബലൂചിസ്താന്‍ ബാര്‍ അസോസിയേഷന്‍ പ്രസിഡണ്ട് ബിലാല്‍ അന്‍വര്‍ കാസിയെ അജ്ഞാതര്‍ വെടിവെച്ചുകൊന്നതിന്റെ പിന്നാലെയാണ് ആശുപത്രിയില്‍ സ്‌ഫോടനമുണ്ടായത്. കാസിയുടെ മൃതദേഹം സൂക്ഷിച്ചിരുന്ന ആശുപത്രിയിലാണ് സ്‌ഫോടനമുണ്ടായത്. മൃതദേഹം ഏറ്റുവാങ്ങാന്‍ അഭിഭാഷകര്‍ ആശുപത്രയില്‍ എത്തിയപ്പോഴാണ് സ്‌ഫോടനമുണ്ടായത് എന്നത് സംഭവത്തിന് കൂടുതല്‍ ഗൗരവമര്‍ഹിക്കുന്നു.

അഭിഭാഷകര്‍ ഉള്‍പടെ എഴുപതോളം പേര്‍ക്ക് പരിക്കേറ്റു. മൃതദേഹം ഏറ്റുവാങ്ങുന്നത് റിപ്പോര്‍ട്ട് ചെയ്യാനെത്തിയ മാധ്യമ പ്രവര്‍ത്തകരും പരിക്കേറ്റവരില്‍പെടുന്നു. സ്‌ഫോടത്തിന് മുന്‍പ് അജ്ഞാതന്‍ വെടിയുതിര്‍ത്തതായി പൊലിസ് പറഞ്ഞു. അക്രമത്തിന്റെ ഉത്തരവാദിത്വം ആരും ഏറ്റെടുത്തിട്ടില്ല. സംഭവം ശക്തമായ രീതിയില്‍ അന്വേഷിക്കുമെന്ന് ബലൂചിസ്താന്‍ ആഭ്യന്തര മന്ത്രി സര്‍ഫാസ് ബഗ്തി മാധ്യമങ്ങളോട് പറഞ്ഞു.