കോഴിക്കോട്: തോപ്പയിലില്‍ മുസ്‌ലിം ലീഗ് പ്രവര്‍ത്തകന് നേരെയുണ്ടായ അക്രമത്തില്‍ ഒരാള്‍ക്കെതിരേ വധശ്രമത്തിന് കേസെടുത്തു.
ലീഗ്-സി.പി.എം പ്രവര്‍ത്തകര്‍ തമ്മിലുണ്ടായ സംഘര്‍ഷത്തിനിടെ സോഡാക്കുപ്പികൊണ്ടു യുവാവിന്റെ തലക്കടിയേറ്റ സംഭവത്തിലാണ് പൊലിസ് വധശ്രമത്തിന് കേസെടുത്തത്. മുസ്‌ലിം യൂത്ത്‌ലീഗ് യുവജനയാത്രയോടനുബന്ധിച്ച് തോപ്പയില്‍ ഭാഗത്ത് എത്തിയ കടമേരി സ്വദേശി ഇസ്മാഈലിനെ ആക്രമിച്ചതുമായി ബന്ധപ്പെട്ടാണ് വെള്ളയില്‍ പൊലിസ് ഹാഷിം എന്നയാള്‍ക്കെതിരേ കേസെടുത്തത്.
അതേസമയം ഹാഷിമിനെ കുറിച്ച് പൊലിസ് അന്വേഷിച്ചുവരികയാണ്. ഇയാളെ കുറിച്ചുള്ള കൂടുതല്‍ വിവരങ്ങള്‍ ലഭിച്ചിട്ടില്ല. സംഭവത്തില്‍ പ്രതിഷേധിച്ച് കഴിഞ്ഞ ദിവസം രാത്രി യൂത്ത്‌ലീഗ് പ്രവര്‍ത്തകര്‍ ഇതുവഴിയെത്തിയ വാഹനങ്ങള്‍ തടഞ്ഞിരുന്നു.
നടക്കാവ് സി.ഐ ടി.കെ അഷ്‌റഫിന്റെ നേതൃത്വത്തിലുള്ള പൊലിസ് എത്തിയാണ് സ്ഥിതി ശാന്തമാക്കിയത്.