കാഞ്ഞങ്ങാട്ട്: കലോത്സവത്തിന്റെ നിറമുള്ള ലോകമൊന്നും കാണാതെ ഉമ്മയുടെ കൈപിടിച്ച് അവള്‍ കലോത്സവ നഗരിയിലൂടെ നടന്നു. വേദിയിലെത്തി ഉള്‍ക്കണ്ണിന്‍ വെളിച്ചത്തില്‍  ആസ്വാദകരുടെ മനംനിറച്ച്  പാടി.

ഫാത്തിമ അന്‍ഷി എന്നാണ് ഈ പ്രതിഭയുടെ പേര്. മലപ്പുറം ആര്‍. എം.എച്ച്.എസ്.എസ് ഒന്‍പതാം തരം വിദ്യാര്‍ഥിനി. സംസ്ഥാന സ്‌കൂള്‍ കലോത്സവത്തില്‍ ശാസ്ത്രീയ സംഗീതത്തിലാണ് അന്‍ഷിയുടെ വിജയം. ജന്‍മനാ ഇരു കണ്ണുകള്‍ക്കും കാഴ്ചയില്ല. ചെറുപ്പം മുതല്‍ നന്നായി പാടും. സ്‌കൂള്‍ കലോത്സവങ്ങളിലും സ്‌പെഷല്‍ സ്‌കൂള്‍ കലോത്സവങ്ങളിലും തിളങ്ങി.

നിറങ്ങളില്ലാതെ വളര്‍ന്ന ഫാത്തിമ അന്‍ഷിയുടെ ഉള്ളിലെ സംഗീതം കണ്ടെത്തി പരിശീലിപ്പിച്ചത് നിസാര്‍ തൊടുപുഴയാണ്. ആറ്റുവാശേരി മോഹനന്‍ പിള്ളയും സംഗീതവഴിയില്‍ അറിവ് പകര്‍ന്നു. മേലാറ്റൂര്‍ എടപ്പറ്റയിലെ അബ്ദുല്‍ ബാരിയുടെയും ഷംലയുടെയും മകളാണ്. കേട്ടാണ് സ്‌കൂളിലെയും, സംഗീതത്തിലെയും പഠനം. പഠനത്തില്‍ മിടുക്കിയാണ് അന്‍ഷി. കഴിഞ്ഞ വര്‍ഷവും ഇതേ ഇനത്തില്‍ സംസ്ഥാന തലത്തില്‍ എ ഗ്രേഡ് നേടിയിരുന്നു.