റിയാദ്: സഊദി അറേബ്യയും യു എ എയും ഒറ്റ വിസയിൽ സന്ദർശനം നടത്താൻ സഹായിക്കുന്ന സഊദി - യു എ ഇ സംയുക്ത വിസ കരാറിൽ ഇരു രാജ്യങ്ങളും ഒപ്പ് വെച്ചു. സഊദി കിരീടാവകാശി മുഹമ്മദ് ബിൻ സൽമാൻ രാജകുമാരന്റെ യു എ ഇ സന്ദർശനത്തിനിടെയാണ് ഏറെ പ്രാധാന്യമുള്ള സംയുക്ത വിസ കരാറിൽ ഇരു രാജ്യങ്ങളും ഒപ്പ് വെച്ചത്. യു എ ഇ വാർത്താ ഏജൻസിയായ "വാം"ആണ് ഇക്കാര്യം റിപ്പോർട്ട് ചെയ്‌തത്‌. വിനോദ സഞ്ചാര മേഖലയുടെ അഭിവൃദ്ധി ലക്ഷ്യമാക്കിയുള്ള സന്ദർശക ഏക വിസ സമ്പ്രദായം ഇരു രാജ്യങ്ങളിലെയും താമസക്കാർക്ക് ഏറെ ഉപകാരപ്പെടും. സഊദി കമ്മീഷൻ ഫോർ ടൂറിസം ആന്റ് നാഷണൽ ഹെറിറ്റേജും (എസ്‌സി‌ടി‌എച്ച്) യു എ ഇ മന്ത്രാലയവും തമ്മിലുള്ള സഹകരണത്തിന്റെ ഭാഗമായുള്ള കരാറുകളിൽ സുപ്രധാനമാണ് സഊദി-യു എ ഇ ഏകീകരണ സന്ദർശന വിസ കരാർ.

[gallery columns="9" size="full" ids="795725" orderby="rand"]

സംയുക്ത വിസ പദ്ധതിയുടെ ഭാഗമായി ഇരു രാജ്യങ്ങളിലെയും അതിർത്തി കവാടങ്ങളിലും വിമാനത്താവളങ്ങളിലും നടപടികൾ ഏറെ ലഘൂകരിക്കപ്പെടും. ഇരു രാജ്യങ്ങളിലും താമസിക്കുന്നവർക്ക് ഇരു ഭാഗത്തേക്കും യഥേഷ്‌ടം സഞ്ചരിക്കാൻ സാധിക്കുന്ന വിസ സമ്പ്രദായമെന്ന് മാത്രമാണ് ഇപ്പോൾ പുറത്ത് വന്ന വിവരങ്ങൾ. ഇത് സംബന്ധിച്ച കൂടുതൽ വിവരങ്ങൾ വെളിപ്പെട്ടിട്ടില്ല. കൂടാതെ, അതിർത്തി കടന്നുള്ള പേയ്‌മെന്റുകൾ സുഗമമാക്കുന്നത് ലക്ഷ്യമിട്ട്, പരീക്ഷണാത്മക ഡിജിറ്റൽ കറൻസി അവതരിപ്പിക്കാനും ഇരു രാജ്യങ്ങളും തമ്മിൽ ധാരണയായി.
സഊദി അറേബ്യ, യു എ ഇ രാജ്യങ്ങൾക്ക് പുറമെ മേഖലയിലുടനീളം ഭക്ഷ്യ വെല്ലുവിളികളെ നേരിടാൻ ലക്ഷ്യമിട്ട് ഭക്ഷ്യസുരക്ഷയ്ക്കായി പ്രത്യേക സംയുക്ത നീക്കങ്ങളും കിരീടാവകാശിയുടെ യു എ ഇ സന്ദർശനത്തോടനുബന്ധിച്ച് പ്രഖ്യാപിച്ചിട്ടുണ്ട്. സൈബർ ആക്രമണം ചെറുക്കാൻ ഒരുമിച്ച് നീങ്ങുന്നതിന് വേണ്ട നടപടികൾ സ്വീകരിക്കാനും ഇരു രാജ്യങ്ങളിലെയും യുവാക്കൾ തമ്മിലുള്ള പങ്കാളിത്തം ശക്തിപ്പെടുത്തുന്നതിനും ആശയങ്ങൾ കൈമാറുന്നതിനും യുവ പ്രതിഭകളെ പ്രോത്സാഹിപ്പിക്കുന്നതിനുള്ള ശ്രമങ്ങൾ ഏകോപിപ്പിക്കുന്നതിനുമായി സഊദി-എമിറാത്തി യൂത്ത് കൗൺസിൽ രൂപീകരിക്കാനും ധാരണയായിട്ടുണ്ട്.