സുല്‍ത്താന്‍ ബത്തേരി: അയല്‍വീട്ടുകാര്‍ തമ്മിലുള്ള സംഘര്‍ഷത്തില്‍ 15 പേര്‍ക്ക് പരുക്ക്്. നൂല്‍പ്പുഴ കല്ലൂര്‍ തേക്കുംപറ്റം നാലുസെന്റ് കോളനിയിലാണ് കഴിഞ്ഞദിവസം സംഘര്‍ഷമുണ്ടായത്.
അയല്‍പക്ക കുടുംബങ്ങള്‍ തമ്മിലുണ്ടായ വാക്കേറ്റം സംഘര്‍ഷത്തില്‍ കലാശിക്കുകയായിരുന്നു. ഇരുവിഭാഗങ്ങള്‍ തമ്മിലുണ്ടായ ഏറ്റുമുട്ടലില്‍ എട്ടുമാസം പ്രായമുള്ള കുട്ടിയടക്കം 15 പേര്‍ സുല്‍ത്താന്‍ ബത്തേരിയിലെ വിവിധ ആശുപത്രികളില്‍ ചികില്‍സയിലാണ്. കോളനി നിവസികളായ സലാഹുദ്ദീന്‍(25), ഫാത്തിമ(23), ഷീജ(25), ഡിന്‍സണ്‍(20), ലക്ഷ്മി(48), സീത(20), ടോമി (57),അന്നു(54) എന്നിവര്‍ താലൂക്ക് ആശുപത്രിയില്‍ ചികിത്സ തേടി. തങ്ങളുടെ വീട്ടില്‍ ഒരുകൂട്ടം ആളുകള്‍ കയറി ആക്രമിക്കുകയായിരുന്നു. തുടര്‍ന്ന് താലൂക്ക് ആശുപത്രിയിലെത്തിയ തങ്ങളെ ഇവിടെയെത്തിയും മര്‍ദ്ദിച്ചതായും ഇവര്‍ പറയുന്നു.
അതേസമയം തങ്ങളെ കോളനിക്ക്് പുറത്തുനിന്നുള്ളവരടക്കം വീട്ടില്‍ കയറി ആക്രമിക്കുകയായിരുന്നുവെന്നും ആക്രമണത്തില്‍ തനിക്കും കുടുംബത്തിനും തടയാനെത്തിയ അയല്‍പക്കക്കാര്‍ക്കും മര്‍ദനമേറ്റതായും സ്വകാര്യആശുപത്രിയില്‍ ചികില്‍സയില്‍ കഴിയുന്ന അജയന്‍ പറഞ്ഞു.
സംഭവത്തില്‍ ബത്തേരി പൊലിസ് കേസെടുത്ത് അന്വേഷണം ആരംഭിച്ചു.