തേഞ്ഞിപ്പലം: റോഡരികിലെ തലപോയ തെങ്ങ് യാത്രക്കാര്‍ക്ക് ഭീഷണിയാകുന്നു. ചേളാരി ആലുങ്ങല്‍ കടക്കാട്ടുപാറ റോഡില്‍ പാടാട്ടാലിന് സമീപമാണ് വഴിയോരത്ത് തെങ്ങ് ഉണങ്ങി നില്‍ക്കുന്നത്. തലപോയ തെങ്ങ് ഏതുനിമിഷവും റോഡിലേക്കു വീഴാവുന്ന അവസ്ഥയിലാണ്.
ചേളാരിയില്‍ നിന്ന് കടക്കാട്ടുപാറ, ഒലിപ്രംകടവ്, കോമരപ്പടി ഭാഗങ്ങളിലേക്ക് ദിനേന ഒട്ടനവധി യാത്രക്കാര്‍ ഇതുവഴി കടന്നുപോകുന്നുണ്ട്. സമീപത്തെ നിഅ്മത്തുല്‍ ഇസ്‌ലാം മദ്‌റസയിലേക്കുള്ള വിദ്യാര്‍ഥികളടക്കം നിരവധി പേര്‍ കാല്‍നടയാത്രയ്ക്കും ഈ വഴി ഉപയോഗപ്പെടുത്തുന്നു. റോഡരികില്‍ അപകട ഭീഷണിയുയര്‍ത്തി നില്‍ക്കുന്ന ഈ തെങ്ങ് മുറിച്ചുമാറ്റണമെന്നാവശ്യപ്പെട്ട് നാട്ടുകാര്‍ നേരത്തേ അധികൃതരെ സമീപിച്ചിരുന്നുവെങ്കിലും ഫലം കണ്ടില്ല. ഉണങ്ങിയ തെങ്ങ് മുറിച്ചുമാറ്റാനുള്ള നടപടി വേഗത്തിലാക്കണമെന്ന് നാട്ടുകാര്‍ ആവശ്യപ്പെടുന്നു.