പേരാമ്പ്ര: മലബാറിലെ ഏക മുതല വളര്‍ത്തുകേന്ദ്രം അടച്ചുപൂട്ടാന്‍ വീണ്ടും ഉത്തരവിറങ്ങി. വനം വകുപ്പിന്റെ അധീനതയിലുള്ള പെരുവണ്ണാമൂഴി മുതല വളര്‍ത്തു കേന്ദ്രമാണ് അടച്ചുപൂട്ടുന്നത്. സെന്‍ട്രല്‍ സൂ അതോറിറ്റിയുടെ നിര്‍ദേശപ്രകാരമാണ് ഉത്തരവ്. 1977 ല്‍ ഡോ. കെ.ജി അടിയോടി വനം മന്ത്രിയായിരുന്നപ്പോഴാണു മുതല വളര്‍ത്തുകേന്ദ്രം പെരുവണ്ണാമൂഴിയില്‍ സ്ഥാപിച്ചത്.
ഒട്ടേറെ ടൂറിസ്റ്റുകള്‍ ദിനവും മുതലകളെ കാണാന്‍ ഇവിടെ എത്താറുണ്ട്. മുതലകള്‍ക്കു ജീവിക്കാന്‍ പറ്റിയ ആവാസ വ്യവസ്ഥ പെരുവണ്ണാമൂഴിയിലില്ലെന്നാണ് സെന്‍ട്രല്‍ സൂ അതോറിറ്റിയുടെ കണ്ടെത്തല്‍. ഇവിടെ ഇപ്പോള്‍ ആണ്‍ വര്‍ഗത്തില്‍പെട്ട രണ്ടു മുതലകളാണുള്ളത്. ഏറ്റവും കാര്യക്ഷമമായാണു മുതലകളെ കഴിഞ്ഞ 41 കൊല്ലമായി പരിപാലിച്ചുവരുന്നത്. രണ്ടുവര്‍ഷം മുന്‍പ് കേന്ദ്രം ഇവിടെ നിന്ന് മാറ്റാന്‍ സെന്‍ട്രല്‍ സൂ അതോറിറ്റി നീക്കം നടത്തിയിരുന്നു.
മുല്ലപ്പള്ളി രാമചന്ദ്രന്‍ എം.പിയുടെ നേതൃത്വത്തില്‍ നടത്തിയ പരിശ്രമം കൊണ്ടാണു ഭീഷണി ഒഴിവായത്. മുതല വളര്‍ത്തുകേന്ദ്രം പെരുവണ്ണാമൂഴിയില്‍നിന്ന് മാറ്റിയാല്‍ മലബാറുകാര്‍ക്ക് മുതലകളെ കാണാന്‍ തിരുവനന്തപുരം നെയ്യാര്‍ ഡാമില്‍ പോകേണ്ടി വരും.