ഖാര്‍ത്തൂം: നിരവധി ഇന്ത്യന്‍ തൊഴിലാളികള്‍ ജോലിചെയ്യുന്ന സുദാനിലെ സെറാമിക് കമ്പനിയിലുണ്ടായ ഗ്യാസ് ടാങ്കര്‍ സ്‌ഫോടനത്തില്‍ 18 ഇന്ത്യക്കാരുള്‍പ്പെടെ 23 മരണം. 130 പേര്‍ക്ക് പരുക്കേറ്റു. 16 ഇന്ത്യക്കാരെ കാണാതായതായും ഖാര്‍ത്തൂമിലെ ഇന്ത്യന്‍ എംബസി അറിയിച്ചു. ഏഴ് ഇന്ത്യക്കാരെ ആശുപത്രിയില്‍ പ്രവേശിപ്പിച്ചു. ഇതില്‍ നാലുപേരുടെ നില ഗുരുതരമാണ്. ബെഹ്‌രി ഭാഗത്തെ സീല സെറാമിക് കമ്പനിയിലാണ് സ്‌ഫോടനമുണ്ടായത്. ഇവിടെ 50 ഇന്ത്യക്കാരാണ് ജോലി ചെയ്യുന്നത്.
ഉത്തര ഖാര്‍ത്തൂമിലെ വ്യവസായ മേഖലയിലാണ് ദുരന്തം. സ്‌ഫോടനത്തില്‍ ഫാക്ടറി കോംപൗണ്ടില്‍ നിര്‍ത്തിയിട്ട കാറുകള്‍ക്കും തീപ്പിടിച്ചതായി ദൃക്‌സാക്ഷി പറഞ്ഞു.