പുതുക്കാട്: വരന്തരപ്പിള്ളി റിങ് റോഡിലെ സ്റ്റേറ്റ് ബാങ്കിന്റെ എ.ടി.എം സെന്റര്‍ കുത്തിത്തുറന്ന് കവര്‍ച്ച നടത്താന്‍ ശ്രമിച്ച സംഭവത്തില്‍ കൂടുതല്‍ നിരീക്ഷണ ക്യാമറകളില്‍ നിന്നുള്ള ദൃശ്യങ്ങള്‍ പൊലിസ് പരിശോധിക്കുന്നു. ഇതുവരെ ലഭിച്ച ദൃശ്യങ്ങള്‍ പരിശോധിച്ചതില്‍ പ്രതികളെ കുറിച്ച് സൂചനകളൊന്നും ലഭിച്ചിട്ടില്ലെന്ന് പൊലിസ് പറഞ്ഞു. വിദഗ്ധന്റെ സഹായത്തോടെയാണ് വരന്തരപ്പിള്ളി സ്റ്റേഷനില്‍ നിരീക്ഷണ ക്യാമറകളിലെ ദൃശ്യങ്ങള്‍ പരിശോധിക്കുന്നത്.
ഇതിനിടെ സംശയാസ്പദമായ രീതിയില്‍ കണ്ട രണ്ടു പേരെ കസ്റ്റഡിയില്‍ എടുത്തെങ്കിലും കവര്‍ച്ചയുമായി ബന്ധമില്ലെന്ന് കണ്ട് അവരെ വിട്ടയച്ചു. കവര്‍ച്ചാ ദൃശ്യങ്ങളില്‍ പതിഞ്ഞ ചിത്രങ്ങളുടെ അടിസ്ഥാനത്തില്‍ ഇതര സംസ്ഥാനക്കാരാണ് സംഭവത്തിന് പിന്നിലെന്നാണ് പൊലിസ് കരുതുന്നത്. ഇവര്‍ താമസിക്കുന്ന വീടുകളിലും ലോഡ്ജുകളിലും പൊലിസ് പരിശോധന കര്‍ശനമാക്കിയിരിക്കുകയാണ്. ചാലക്കുടി ഡിവൈ. എസ്.പിയുടെ പ്രത്യേക സ്‌ക്വാഡും വരന്തരപ്പിള്ളി പൊലിസും ചേര്‍ന്നാണ് അന്വേഷണം നടത്തുന്നത്.