കണ്ണൂര്‍: ദേശീയ സീനിയര്‍ വനിത ബോക്‌സിങ് ചാംപ്യന്‍ഷിപ്പിലെ നാലാംദിനം കേരളത്തിനു സമ്മാനിച്ചത് മൂന്നു ക്വാര്‍ട്ടറുകള്‍. കേരളത്തിനു പെണ്‍ ഉശിരിന്റെ ആവേശ പഞ്ചുകള്‍ സമ്മാനിച്ചായിരുന്നു അന്‍സുമോള്‍ ബെന്നിയും അഞ്ജു സാബുവും പി.എം അനശ്വരയും ക്വാര്‍ട്ടറില്‍ പ്രവേശിച്ചത്. 69 കിലോ ഭാരത്തില്‍ ലഡാക്കിന്റെ ഫരീന ഇല്യാസിനെ ആദ്യറൗണ്ടില്‍ പരാജയപ്പെടുത്തിയാണ് അന്‍സു ക്വാര്‍ട്ടറില്‍ ഉറപ്പിച്ചത്.
48 കിലോ ഭാരത്തില്‍ അസിമിന്റെ പ്രിയ ഗോഷിനെ അഞ്ചില്‍ അഞ്ചു ജഡ്ജിമാരുടെ പിന്തുണയോടെയാണ് അഞ്ജു ക്വാര്‍ട്ടറില്‍ കയറിയപ്പോള്‍ 81 പ്ലസ് കിലോ ഭാരത്തില്‍ ആദ്യറൗണ്ടില്‍ ഉത്തര്‍പ്രദേശിന്റെ ഹിമണി റനയെ തോല്‍പ്പിച്ചു പി.എം അനശ്വരയും ക്വാര്‍ട്ടറില്‍ പ്രവേശിച്ചു. 81 കിലോവിഭാഗത്തില്‍ ശീതള്‍ ഷാജിയും 54 കിലോ വിഭാഗത്തില്‍ നിസി ലസി തമ്പിയും പരാജയപ്പെട്ടു. ക്വാര്‍ട്ടര്‍ മത്സരങ്ങള്‍ ഇന്നു നടക്കും. കേരളത്തിനായി നാലു പേര്‍ ഇന്നു ക്വാര്‍ട്ടര്‍ മത്സരത്തിനിറങ്ങും. ബുധനാഴ്ച കേരളത്തിന്റെ ഇന്ദ്രജ ക്വാര്‍ട്ടറില്‍ കയറിയിരുന്നു.