ദേശീയ സീനിയര്‍ ബോക്‌സിങ് ചാംപ്യന്‍ഷിപ്പില്‍ കന്നിയങ്കത്തിലെ ആദ്യറൗണ്ടില്‍ തന്നെ ക്വാര്‍ട്ടറില്‍ കയറി കേരളത്തിന്റെ അന്‍സുമോള്‍ ബെന്നി. 69 കിലോവിഭാഗത്തില്‍ ലഡാക്കിന്റെ ഫരീന ഇല്യാസിനെ ഇടിച്ചിട്ടാണ് അന്‍സു ക്വാര്‍ട്ടറില്‍ കയറിയത്. ഇടിക്കൂട്ടില്‍ തുടക്കം മുതല്‍ മുന്നേറിയ അന്‍സു നിശ്പ്രയാസം ആദ്യറൗണ്ടില്‍ തന്നെ എതിരാളിയെ തോല്‍പ്പിക്കുകയായിരുന്നു.
ഇടുക്കി രാജകുമാരിക്കാരിയായ അന്‍സു തിരുവനന്തപുരം ആറ്റിങ്ങലിലെ ഗവ. കോളജിലെ മൂന്നാംവര്‍ഷ ബിരുദ വിദ്യാര്‍ഥിയാണ്. ഒന്‍പതുവര്‍ഷമായി പരിശീലനം നടത്തുന്ന അന്‍സു ആദ്യമായി ഇടിക്കൂട്ടില്‍ കയറിയപ്പോള്‍ ആദ്യറൗണ്ടില്‍ തന്നെ ജയിച്ചു. കഴിഞ്ഞ വര്‍ഷം സംസ്ഥാനതലത്തില്‍ ഗോള്‍ഡും ഇന്റര്‍ കോളജിയറ്റ് മത്സരത്തില്‍ വെള്ളിയും നേടിയിരുന്നു.
മിന്നലായി അനശ്വര
85പ്ലസ് കിലോ വിഭാഗത്തില്‍ കേരളത്തിന്റെ പി.എം അനശ്വരക്ക് മത്സരം തീര്‍ക്കാന്‍ വേണ്ടിവന്നത് രണ്ടുമിനുട്ട് മാത്രം.
ഉത്തര്‍പ്രദേശിന്റെ ഹിമനി റാണിയെ ക്ഷമ പരീക്ഷിക്കാതെ ആദ്യറൗണ്ടില്‍ ഇടിച്ചുമലര്‍ത്തുകയായിരുന്നു. തുടക്കത്തില്‍ തന്നെ തുടരെ തുടരെ ആക്രമിച്ച അനശ്വരയുടെ മുന്നില്‍ ഹിമനി റഫറി രണ്ടു കൗണ്ട് കൊടുക്കുകയും ആദ്യറൗണ്ടില്‍ തന്നെ അനശ്വരയെ വിജയിച്ചതായി പ്രഖ്യാപിക്കുകയായിരുന്നു.
കോഴിക്കോട് ജില്ലക്കാരിയായ അനശ്വര കഴിഞ്ഞ രണ്ടു തവണ കവിതാ ചഹലിനോട് തോറ്റിരുന്നു. മനോഹരന്റെയും വിജയയുടേയും മകളാണ്.