ന്യൂഡല്‍ഹി: പോരാട്ടത്തിന് മുന്‍പേ കളത്തിന് പുറത്ത് വാഗ്വാദങ്ങളുമായി വിജേന്ദറും സുല്‍ഫിക്കര്‍ മൈമത്യാലിയും. ഇരുവരും തമ്മിലുള്ള മത്സരം ഓഗസ്റ്റ് അഞ്ചിനാണ് ആരംഭിക്കുന്നത്. വിജേന്ദറിന്റെ ചൈനീസ് ഉല്‍പന്നങ്ങള്‍ എന്ന പ്രകോപനപരമായ പരാമര്‍ശമാണ് ചൂടേറിയ വാഗ്വാദങ്ങള്‍ ഇടയാക്കിയത്.
ചൈനീസ് ഉല്‍പന്നങ്ങള്‍ അധിക കാലം നിലനില്‍ക്കാറില്ലെന്നായിരുന്നു വിജേന്ദറിന്റെ പ്രസ്താവന. ചൈനീസുകാര്‍ എത്രത്തോളം മികച്ചവരാണെന്ന് വിജേന്ദറിന് കാണിച്ചുകൊടുക്കാമെന്ന് മൈമത്യാലി തിരിച്ചടിച്ചു. ഇന്ത്യക്ക് പലതും പഠിപ്പിച്ച് കൊടുത്തവരാണ് ചൈനക്കാര്‍. ഇപ്പോള്‍ വിജേന്ദറിന്റെ സമയം അടുത്തു. അദ്ദേഹത്തിന്റെ നാട്ടിലേക്കാണ് പോരാട്ടത്തിനായി ഞാന്‍ വരുന്നത്. മത്സരത്തിന്റെ ആദ്യ ഘട്ടത്തില്‍ തന്നെ നോക്കൗട്ടില്‍ താങ്കളെ ഞാന്‍ പുറത്താക്കുമെന്ന് ചൈനീസ് താരം മുന്നറിയിപ്പ് നല്‍കി.
മുംബൈയിലാണ് മത്സരം നടക്കുന്നത്. ബാറ്റില്‍ഗ്രൗണ്ട് ഏഷ്യ എന്നാണ് ഇരുവരും തമ്മിലുള്ള പോരാട്ടത്തെ വിശേഷിപ്പിക്കുന്നത്. ഡബ്ല്യു.ബി.ഒ ഓറിയന്റല്‍ സൂപ്പര്‍ മിഡില്‍വെയ്റ്റ് ജേതാവാണ് മൈമത്യാലി. ജേതാക്കള്‍ക്ക് രണ്ടു മെഡലുകള്‍ ഒരുമിച്ച് ലഭിക്കും. എതിരാളിയുടെ മേല്‍ തുടക്കം മുതല്‍ ആധിപത്യം നേടാന്‍ ശ്രമിക്കുമെന്ന് വിജേന്ദര്‍ സൂചിപ്പിച്ചു.