ന്യൂഡല്‍ഹി: ശബരിമല വിഷയത്തിലെ ഹരജികള്‍ അടിയന്തരമായി പരിഗണിക്കാനാവില്ലെന്ന് സുപ്രിം കോടതി.

എല്ലാ പ്രായത്തിലുമുള്ള സ്ത്രീകള്‍ക്കും ശബരിമലയില്‍ പ്രവേശിക്കാം എന്ന സുപ്രിംകോടതി വിധി പുനപരിശോധിക്കാന്‍ നല്‍കിയ ഹരജി വേഗത്തില്‍ പരിഗണിക്കാനാകില്ലെന്ന് സുപ്രിംകോടതി അറിയിച്ചു. സാധാരണ ക്രമത്തില്‍ മാത്രമേ കേസ് പരിഗണിക്കാനാകൂവെന്നും സുപ്രിംകോടതി അറിയിച്ചു.

വിഷയത്തില്‍ സംസ്ഥാന സര്‍ക്കാര്‍ നല്‍കിയ ഹരജികളും വേഗത്തില്‍ പരിഗണിക്കില്ല. മൂന്നംഗ സമിതിക്കെതിരെയും ഹൈക്കോടതിയിലെ കേസുകള്‍ മാറ്റണമെന്നും ആവശ്യപ്പെട്ടായിരുന്നു സര്‍ക്കാരിന്റെ ഹരജി.

ക്രിസ്മസ് അവധിക്ക് മുമ്പായി കേസ് പരിഗണിക്കില്ല. അവധിക്ക് ശേഷം ഇനി ജനുവരി 10 ന് ശേഷം മാത്രമേ കോടതി തുറക്കൂ. ഇതോടെ മണ്ഡലകാലത്തിന് മുമ്പ് ശബരിമല കേസില്‍ മറ്റൊരു വിധി ഉണ്ടാകാനുള്ള സാധ്യത ഇല്ലാതായി.