ന്യൂഡല്‍ഹി: ദ്വിരാഷ്ട്ര സിദ്ധാന്തത്തിന് അടിത്തറ പാകിയത് കോണ്‍ഗ്രസല്ല വീര്‍ സവര്‍ക്കറാണെന്ന് മുതിര്‍ന്ന കോണ്‍ഗ്രസ് നേതാവ് മനീഷ് തിവാരി.
പാര്‍ലമെന്റില്‍ പൗരത്വ ഭേദഗതി ബില്ലിന്റെ (സി.എ.ബി) ചര്‍ച്ചകള്‍ക്കിടെ അമിത് ഷായുടെ ആരോപണങ്ങള്‍ക്ക് മറുപടിയായാണ് തിവാരിയുടെ പ്രതികരണം. 1935 ല്‍ ഹിന്ദു മഹാസഭയുടെ സെഷനില്‍ സവര്‍ക്കര്‍ ദ്വിരാഷ്ട്ര സിദ്ധാന്തത്തിനായി സമ്മര്‍ദ്ദം ചെയലുത്തിയിരുന്നെന്നും അദ്ദേഹം ചൂണ്ടിക്കാട്ടി.

ഇന്ത്യയുടെ വിഭജനത്തിന് കോണ്‍ഗ്രസാണ് ഉത്തരവാദിയെന്നായിരുന്നു കേന്ദ്ര ആഭ്യന്തരമന്ത്രി അമിത് ഷായുടെ ആരോപണം.

' മതാടിസ്ഥാനത്തിലുള്ള വിഭജനത്തിന് കോണ്‍ഗ്രസ് ഉത്തരവാദിയാണെന്ന് ആഭ്യന്തരമന്ത്രി പറഞ്ഞിരുന്നു. എനിക്ക് ഒരു കാര്യം വ്യക്തമാക്കാനുണ്ട്.1935 ല്‍ അഹമ്മദാബാദില്‍ വെച്ച് നടന്ന ഹിന്ദു മഹാസഭാ സമ്മേളനത്തില്‍ സവര്‍ക്കറാണ് ദ്വിരാഷ്ട്ര സിദ്ധാന്തത്തിന് അടിത്തറ പാകിയത്. അല്ലാതെ കോണ്‍ഗ്രസ് അല്ല ' തിവാരിയെ ഉദ്ധരിച്ച് എ.എന്‍.ഐ റിപ്പോര്‍ട്ട് ചെയ്തു.

പൗരത്വ ബില്‍ ഇന്ത്യന്‍ ഭരണഘടനയുടെ ആര്‍ട്ടിക്കിള്‍ 14,15, 21, 25, 26 എന്നീ തത്വങ്ങള്‍ക്ക് വിരുദ്ധമാണെന്നും അദ്ദേഹം പറഞ്ഞു.
'ബില്‍ ഭരണഘടനയ്ക്ക് വിരുദ്ധമാണ്, ബാബാസാഹേബ് അംബേദ്കര്‍ മുന്നോട്ടുവച്ച പ്രത്യയശാസ്ത്രത്തിനും ബില്‍ എതിരാണ്,' തിവാരി പറഞ്ഞു. മതേതരത്വം ഭരണഘടനയില്‍ ഉള്‍പ്പെടുത്തിയിട്ടുണ്ടെന്നും തിവാരി കൂട്ടിച്ചേര്‍ത്തു.

ഏറെ നാടകീയ സംഭവങ്ങള്‍ക്കൊടുവിലാണ് ലോക്‌സഭയില്‍ ദേശീയ പൗരത്വ ബില്‍ പാസായത്. 80 ന് എതിരെ 311 വോട്ടുകള്‍ നേടിയാണ് ബില്‍ പാസായത്.

കോണ്‍ഗ്രസും ഇടതുപാര്‍ട്ടികളും മുസ്‌ലിം ലീഗും ഉള്‍പ്പെടെ പ്രതിപക്ഷകക്ഷികളിലെ 82 അംഗങ്ങള്‍ ബില്‍ അവതരണത്തെ എതിര്‍ക്കുകയും ചെയ്തു.