കൊണ്ടോട്ടി: കുഴിമണ്ണ പഞ്ചായത്തിലെ ഐ.എ.വൈ ഭവനപദ്ധതി ക്രമക്കേടുമായി ബന്ധപ്പെട്ട് നിയമനടപടികള്‍ നേരിടുന്ന മുന്‍ വി.ഇ.ഒ. പൊലിസ് കസ്റ്റഡിയില്‍. മുന്‍ വി.ഇ.ഒ മിനിമോളെ ഒരു ദിവസത്തേക്കാണ് കൂടുതല്‍ അന്വേഷണത്തിന് മലപ്പുറം ഒന്നാം ക്ലാസ് ജുഡീഷ്യല്‍ മജിസ്‌ട്രേറ്റ് കോടതി പൊലിസ് കസ്റ്റഡിയില്‍ വിട്ടത്.
കുഴിമണ്ണ പഞ്ചായത്തില്‍ കഴിഞ്ഞ ഭരണസമിതിയുടെ കാലത്ത് ഐ.എ.വൈ ഭവന പദ്ധതിയില്‍ വ്യാപക ക്രമക്കേട് നടന്നത് ഏറെ വിവാദമായിരുന്നു. ഗുണഭോക്തൃപട്ടികയില്‍ അനര്‍ഹരെ തിരുകിക്കയറ്റിയും ഫണ്ട് തിരിമറിനടത്തിയതും വിജിലന്‍സ് അന്വേഷണത്തിലാണ്.
പഞ്ചായത്തിലെ വട്ടിപ്പറമ്പത്ത് കല്യാണിക്ക് അനുവദിച്ച 1,05,000 രൂപ അന്നത്തെ എസ്.സി പ്രമോട്ടര്‍ പുഷ്പയുടെ മക്കളുടെ ബാങ്ക് അക്കൗണ്ടിലേക്ക് മാറ്റിയത് സംബന്ധിച്ച പരാതിയിലാണ് വി.ഇ.ഒ. ഇപ്പോള്‍ പൊലിസ് കസ്റ്റഡിയിലായത്. ക്രമക്കേട് കണ്ടെത്തിയതിന് തുടര്‍ന്ന് വി.ഇ.ഒയെയും അരീക്കോട് ബി.ഡി.ഒയെയും നേരത്തെ സസ്‌പെന്‍്ഡ് ചെയ്തിരുന്നു. അന്വേഷണം നടത്തി നിശ്ചിത സമയത്തിനകം കുറ്റപത്രം നല്‍കാഞ്ഞതിനാല്‍ വി.ഇ.ഒ ജോലിയില്‍ പ്രവേശിച്ചിരുന്നു.
കേസുമായി ബന്ധപ്പെട്ട് കഴിഞ്ഞ ദിവസം വി.ഇ.ഒ. കൊണ്ടോട്ടി പൊലിസ്് സ്‌റ്റേഷനില്‍ ഹാജരാവുകയായിരുന്നു.
അതിനിടെ കസ്റ്റഡിയിലെടുത്ത വി.ഇ.ഒക്ക് ഫോണ്‍ ചെയ്യാന്‍ സൗകര്യം ഒരുക്കിയെന്നും തെളിവെടുപ്പിന് കൊണ്ടുപോയില്ലെന്നും ആരോപിച്ച് പരാതിക്കാരി കൊണ്ടോട്ടി സി.ഐക്ക് പരാതി നല്‍കി.