ഭുവനേശ്വര്‍: ഒഡിഷയില്‍ നടക്കുന്ന ഹോക്കി ലോകകപ്പില്‍ ഇന്ത്യ ക്വാര്‍ട്ടര്‍ ഫൈനലില്‍ പ്രവേശിച്ചു. ഇന്നലെ നടന്ന മത്സരത്തില്‍ കാനഡയെ 5-1 എന്ന സ്‌കോറിന് പരാജയപ്പെടുത്തിയാണ് ഇന്ത്യ ക്വാര്‍ട്ടറില്‍ പ്രവേശിച്ചത്. മൂന്ന് ക്വാര്‍ട്ടര്‍ വരെയും മത്സരം 1-1 ന് സമനിലയിലായിരുന്നു. എന്നാല്‍ നാലാം ക്വാര്‍ട്ടറില്‍ ഇന്ത്യന്‍ താരങ്ങള്‍ കൊടുങ്കാറ്റായി മാറുകയായിരുന്നു. 19ാം മിനുട്ടില്‍ ഹര്‍മന്‍ പ്രീത് സിങിലൂടെ ഇന്ത്യ മുന്നിലെത്തി. എന്നാല്‍ 39ാം മിനുട്ടില്‍ കാനഡ താരം വാന്‍ സണ്‍ ഗോള്‍മടക്കി മത്സരം സമനിലയിലാക്കി. പിന്നീട് ഇരു ടീമുകളും ഗോള്‍ കണ്ടെത്താനാവാതെ വിഷമിച്ചു. എന്നാല്‍ കളി അവസാനിക്കാന്‍ മിനുട്ടുകള്‍ മാത്രം ശേഷിക്കെയായിരുന്നു ഇന്ത്യയുടെ ഗോള്‍ വര്‍ഷം.