കുന്നകുളം: ഭരണഘടനക്ക് പോറലേല്‍ക്കാതിരിക്കാന്‍ രാഷ്ട്രീയ ജാഗ്രത മുറുകെ പിടിക്കണമെന്ന് അബ്ദുസ്സമദ് സമദാനി. എസ്.കെ.എസ്.എസ്.എഫ് ജില്ലാ കമ്മിറ്റി നടത്തിയ ഭാരതീയം പരിപാടിയുടെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. രാഷ്ട്രീയ പാര്‍ട്ടികള്‍ മതത്തെ ഹൈജാക്ക് ചെയ്യുന്നതിനെതിരേ ജനങ്ങള്‍ ജാഗരൂകരാകണം. ഭരണപക്ഷത്തിന്റെ പിന്തുണയോടെ അരങ്ങേറുന്ന രാഷ്ട്രീയ അജന്‍ഡകളാണ് മത കലാപങ്ങളെന്നും അദ്ദേഹം പറഞ്ഞു.
ബഹുസ്വരതയാവണം ഇനിയുള്ള ലോകത്തിന്റെ ആദര്‍ശം. നിന്റെ ഹിതം നീ മറ്റുള്ളവരുടെ മേല്‍ അടിച്ചേല്‍പ്പിക്കാതിരിക്കാനാണു ഭാരതീയ പൈതൃകം പഠിപ്പിച്ചിരിക്കുന്നതെന്നും അദ്ദേഹം കൂട്ടിച്ചേര്‍ത്തു.  മൂല്യങ്ങളുടെ വീണ്ടെടുപ്പിന് എന്ന ആശയം മുന്‍നിര്‍ത്തി പാണക്കാട് ഹമീദലി ശിഹാബ് തങ്ങളുടെ നേതൃത്വത്തില്‍ എസ്.കെ.എസ്.എസ്.എഫ് നടത്തിയ ഭാരതീയം പൈതൃകയാത്ര കൊടുങ്ങല്ലൂരില്‍ നിന്നു തുടങ്ങി കടവല്ലൂരില്‍ അവസാനിച്ചു.സമാപന സമ്മേളനത്തില്‍ കാണിപ്പയ്യൂര്‍ കൃഷ്ണന്‍ നമ്പൂതിരി അധ്യക്ഷനായി. എം.എം മുഹിയുദ്ദീന്‍ മൗലവി, ഹാഫിള് അബൂബക്കര്‍ സിദ്ധീഖ്, ബാബു എം. പാലിശേരി, അഷ്‌റഫ് കോക്കൂര്‍, ഫാ. ഗീവര്‍ഗീസ് ചെമ്മണ്ണൂര്‍ തുടങ്ങിയവര്‍ പ്രസംഗിച്ചു. തുടര്‍ന്ന് നടന്ന സംവാദത്തില്‍ ബഷീര്‍ ഫൈസി ദേശമംഗലം, അഡ്വ.കെ ജയശങ്കര്‍, ഓണംപിള്ളി മുഹമ്മദ് ഫൈസി, അഡ്വ. ഫൈസല്‍ ബാബു പങ്കെടുത്തു.