'രോഹിത്, തുഷാര്‍,മനവ്, രാഹുല്‍ എന്നിവര്‍ ഹിന്ദുക്കളാണ്. മാര്‍ക്കറ്റില്‍ ഇവരുടെ മുന്നില്‍ വെച്ച് മുസ്‌ലിമായ അഹമ്മദ് ഒരു പശുവിനെ കൊന്നു. ഇവിടെ അഹമ്മദ് എന്തെങ്കിലും തരത്തിലുള്ള കുറ്റകൃത്യം ചെയ്തുവോ?'- ഡല്‍ഹിയിലെ ഗുരു ഗോബിന്ദ് സിങ് ഇന്ദ്രപ്രസ്ഥ സര്‍വലാശാലയിലെ മൂന്നാം സെമസ്റ്റര്‍ നിയമ പരീക്ഷയ്ക്ക് വന്ന ചോദ്യമാണിത്.

ഡിസംബര്‍ 7 ന് നടന്ന ക്രിമിനല്‍ നിയമം-1 പരീക്ഷയിലാണ് വിവാദമായ ഈ ചോദ്യമുണ്ടായിരുന്നത്. ചോദ്യപേപ്പര്‍ സമൂഹമാധ്യമങ്ങളില്‍ പ്രചരിച്ചതോടെ സര്‍വകലാശാല ഖേദപ്രകടനവുമായി രംഗത്തെത്തി. ചോദ്യം റദ്ദാക്കാന്‍ തീരുമാനിച്ചിട്ടുണ്ടെന്നും വിദ്യാര്‍ഥികള്‍ ഈ ചോദ്യത്തിനു നല്‍കിയ ഉത്തരത്തിന്റെ അടിസ്ഥാനത്തില്‍ അവരെ വിലയിരുത്തുകയില്ലെന്നും സര്‍വകലാശാല അധികൃതര്‍ അറിയിച്ചു.

വിഷയത്തില്‍ അന്വേഷണം പ്രഖ്യാപിച്ചതായി ഡല്‍ഹി വിദ്യാഭ്യാസ മന്ത്രി മനീഷ് സിസോദിയ അറിയിച്ചു. ഇത് വളരെ വിചിത്രമായ സംഭവമാണെന്നും സമൂഹത്തിലെ ഐക്യത്തിന് കോട്ടം വരുത്തുന്ന ഇത്തരം വിഷയങ്ങളുമായി സഹകരിക്കാനാവില്ലെന്നും സിസോദിയ പറഞ്ഞു. മാത്രമല്ല, കുറ്റം തെളിഞ്ഞാല്‍ ശക്തമായ നടപടിയെടുക്കുമെന്നും അദ്ദേഹം വ്യക്തമാക്കി.