മക്ക: ഇന്ത്യയില്‍നിന്ന് കേന്ദ്ര ഹജ്ജ് സര്‍വിസ് മുഖേന മദീന വഴി തീര്‍ഥാടനത്തിനെത്തിയവര്‍ മക്കയില്‍ എത്തിത്തുടങ്ങി. ആദ്യമാദ്യം മദീനയിലെത്തിയവരാണു ക്രമപ്രകാരം മക്കയിലേക്ക് യാത്ര തിരിച്ചുതുടങ്ങിയത്.
ആദ്യ സംഘത്തില്‍ വിവിധ എംബാര്‍ക്കേഷന്‍ പോയിന്റുകളില്‍നിന്ന് മദീനയിലെത്തിയ തീര്‍ഥാടകസംഘമാണ് മക്കയില്‍ എത്തിയത്. ജിദ്ദ ഇന്ത്യന്‍ കോണ്‍സല്‍ ജനറല്‍ നൂര്‍ റഹ്മാന്‍ ശൈഖ്, ഹജ്ജ് കോണ്‍സല്‍ ഷാഹിദ് ആലം എന്നിവരുടെ നേതൃത്വത്തില്‍ ഇന്ത്യന്‍ ഹജ്ജ് മിഷനും വിവിധ സംഘടനാ വളണ്ടണ്ടിയര്‍മാരും ചേര്‍ന്ന് തീര്‍ഥാടകര്‍ക്ക് ഊഷ്മള സ്വീകരണം നല്‍കി.
ആദ്യ സംഘത്തെ അറബിയിലുള്ള സ്വീകരണ ഗാനങ്ങള്‍ ആലപിച്ചും മുസ്വല്ല, ഇഹ്‌റാം വസ്ത്രങ്ങള്‍, ഈത്തപ്പഴം, റൊട്ടി, വിവിധ പാനീയങ്ങള്‍ തുടങ്ങിയവ നല്‍കിയുമാണു സ്വീകരിച്ചത്.
അസീസിയ കാറ്റഗറിയിലുള്ളവര്‍ക്ക് 191,193,187 നമ്പര്‍ കെട്ടിടങ്ങളിലും ഗ്രീന്‍ കാറ്റഗറിയിലുള്ളവര്‍ക്ക് 532 കെട്ടിടത്തിലുമാണു താമസമൊരുക്കിയിട്ടുള്ളത്.
മക്കയില്‍ ഹാജിമാരുടെ സഹായത്തിനായി വിവിധ സംഘടനാ നേതൃത്വത്തിലുള്ള സന്നദ്ധസംഘങ്ങള്‍ സജീവമാണ്. തീര്‍ഥാടകര്‍ക്ക് ആവശ്യമായ കാര്യങ്ങള്‍ വിശദീകരിച്ചുകൊടുക്കാനും വഴിതെറ്റിയവര്‍ക്കു സഹായം നല്‍കാനും മറ്റ് ആവശ്യങ്ങള്‍ക്കുമെല്ലാമായി മലയാളി സംഘടനാ വളണ്ടണ്ടിയര്‍മാര്‍ സജീവമാണ്.