ന്യൂഡല്‍ഹി: കേന്ദ്രത്തിന്റെ പ്രതിരോധങ്ങള്‍ മറികടന്ന് രാജ്യമെങ്ങും പ്രതിഷേധം കത്തിയാളുന്നു. നിരോധനാജ്ഞയും അറസ്റ്റും വകവെക്കാതെ വിദ്യാര്‍ഥികളും അല്ലാത്തവരുമായി ആയിരങ്ങളാണ് ഓരോ പ്രതിഷേധ കേന്ദ്രങ്ങളിലേക്കും ഒഴുകിയെത്തുന്നത്.

ഡല്‍ഹി ചെങ്കോട്ടക്ക് സമീപം നിരോധനാജ്ഞ പ്രഖ്യാപിച്ചിട്ടുണ്ടെങ്കിലും അവിടെ വന്‍ജനാവലിയാണ് പ്രതിഷേധത്തിനായി എത്തിയത്. പ്രദേശത്ത് കൂട്ട അറസ്റ്റ് നടക്കുകയാണ്. ഉത്തര്‍പ്രദേശിലും നിരോധനാജ്ഞ പ്രഖ്യാപിച്ചിട്ടുണ്ട്. ഹൈദരാബാദില്‍ നൂറോളം വിദ്യാര്‍ഥികളെ പൊലിസ് അറസ്റ്റ് ചെയ്തു. പ്രതിഷേധത്തിനായി വിദ്യാര്‍ഥികള്‍ പോകുന്ന ബസില്‍ പൊലിസ് കയറി. അറസ്റ്റിലായ വിദ്യാര്‍ഥികളെ മൊയിനുദ്ദീന്‍ പൊലിസ് സ്റ്റേഷനിലേക്ക് മാറ്റി. തമിഴ്‌നാട്ടിലും വിവിധയിടങ്ങളിലായി വിദ്യാര്‍ഥി പ്രക്ഷോഭം നടക്കുകയാണ്. ബംഗളൂരുവില്‍ നാഷനല്‍ ലോ സ്‌കൂള്‍ ഓഫ് ഇന്ത്യയിലെ വിദ്യാര്‍ഥികളെ തടവിലാക്കി. മുംബൈ ക്രന്തി മൈതാനിയില്‍ പ്രതിപക്ഷ പാര്‍ട്ടികളുടെ പ്രതിഷേധം നടക്കുകയാണ്.