ഇന്ത്യയിലെ ഗ്രാമങ്ങളിലും ഇന്റര്‍നെറ്റ് എത്തിക്കുക എന്ന ലക്ഷ്യത്തോടെ ഫെയ്‌സ്ബുക്ക് അതിവേഗ വൈഫൈ പദ്ധതി ഒരുക്കുന്നതായി റിപ്പോര്‍ട്ട്. ഇന്ത്യന്‍ ഇന്റര്‍നെറ്റ് സേവന ദാതാക്കളുമായി സഹകരിച്ചാണ് ഫെയ്‌സ്ബുക്ക് എക്‌സ്പ്രസ് വൈഫൈ പദ്ധതി തയ്യാറാക്കുന്നത്. എന്നാല്‍ ഏതാണാ സേവന ദാതാവെന്ന കാര്യം ഫെയ്‌സ്ബുക്ക് പുറത്തുവിട്ടിട്ടില്ല.

ഡാറ്റാ പാക്കുകളിലൂടെ ഉപഭോക്താക്കള്‍ക്ക് ഗ്രാമങ്ങളില്‍ സ്ഥാപിക്കുന്ന വൈ ഫൈ ഹോട്ട്‌സ്‌പോട്ടുകളില്‍ നിന്നും വളരെ വേഗത്തില്‍ ഇന്റര്‍നെറ്റ് ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.

2016 ജനുവരിയില്‍ ഗ്രാമങ്ങളില്‍ ഇതുപോലെ ചെലവു കുറഞ്ഞ രീതിയില്‍ ഇന്റര്‍നെറ്റ് സേവനം ലഭ്യമാക്കാന്‍ ബി.എസ്.എന്‍.എല്ലുമായി ഒരു പദ്ധതി ആവിഷ്‌കരിച്ചിരുന്നു. മൂന്ന് വര്‍ഷത്തേക്ക് 125 ഗ്രാമങ്ങളില്‍ 10 കോടി മുടക്കി ഇന്റര്‍നെറ്റ് കണക്ഷന്‍ ലഭ്യമാക്കിയിരുന്നു.