പാലക്കാട് : മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ പുതുക്കിയ തൊഴില്‍ കാര്‍ഡുകള്‍ നല്‍കിയപ്പോള്‍ വയസ്സ് തിരുത്താത്തത് കാര്‍ഡുടമകളെ പ്രതിസന്ധിയിലാക്കുന്നു. കഴിഞ്ഞ 5 വര്‍ഷമായി നല്‍കിയിരുന്ന തൊഴിലുറപ്പ് പദ്ധതി കാര്‍ഡിന്റെ കാലാവധി 2016 മാര്‍ച്ച് 31ന് അവസാനിച്ചിരുന്നു. തുടര്‍ന്ന് പുതുക്കാന്‍ നല്‍കിയ അപേക്ഷകര്‍ക്ക് നല്‍കിയ പുതിയ കാര്‍ഡിലാണ് പഴയ വയസ്സ് തന്നെ പ്രിന്റ് ചെയ്ത് വന്നിരിക്കുന്നത്.

പാസ്‌പോര്‍ട്ട്, ഡ്രൈവിംഗ് ലൈസന്‍സ്, വോട്ട്് ചെയ്യല്‍, ആധാര്‍കാര്‍ഡ് എടുക്കല്‍, പാന്‍ കാര്‍ഡ് എടുക്കല്‍, ബാങ്ക്് ഇടപാടുകള്‍, വാഹന രജിസ്‌ട്രേഷന്‍  കൈമാറ്റം എന്നീ വിവിധ ആവശ്യങ്ങള്‍ക്ക് തിരിച്ചറിയല്‍ രേഖയായി കേന്ദ്ര, സംസ്ഥാന സര്‍ക്കാറുകള്‍ അംഗീകരിച്ച രേഖകൂടിയാണ് എന്‍.ആര്‍.ഇ.ജിഎസിന്റെ ഈ തൊഴില്‍ കാര്‍ഡ്. തൊഴില്‍ കാര്‍ഡ് എടുത്തിട്ട് അഞ്ച് വര്‍ഷമായെങ്കിലും ഗുണഭോക്താക്കളുടെ പ്രായം പുതിയ കാര്‍ഡില്‍ കൂട്ടി വരാത്തത് ഗുണഭോക്താക്കളെ ആശങ്കയിലാഴ്ത്തിയിട്ടുണ്ട്.

കേന്ദ്ര സര്‍ക്കാര്‍ വെബ്‌സൈറ്റില്‍ നിലിവിലുള്ള തൊഴില്‍ കാര്‍ഡ് പുതുക്കുമ്പോള്‍ പഴയ വയസ്സ് തന്നെയാണ് പ്രിന്റ് ചെയ്തു വരുന്നതെന്നാണ് ഗ്രാമപഞ്ചായത്ത് തല ജീവനക്കാര്‍ നല്‍കുന്ന വിശദീകരണം. എന്നാല്‍ ജില്ലാ തലങ്ങളില്‍ നടന്ന പല യോഗങ്ങളിലും ഈ വിഷയം അറിയിച്ചിരുന്നതായാണ് അറിയാന്‍ കഴിയുന്നത്. എന്നാല്‍ മാസം 4 കഴിഞ്ഞിട്ടും യാതൊരു നടപടിയുമുണ്ടായിട്ടില്ലെന്ന പരാതിയും ഉയര്‍ന്നിട്ടുണ്ട്. വെബ്‌സൈറ്റിലെ ഇത്തരം പരാതി പരിഹരിക്കുമെന്ന് അറിയിച്ചതിനെതുടര്‍ന്ന് പല ഗ്രാമപഞ്ചായത്തുകളിലും കാര്‍ഡ് പുതുക്കല്‍ തല്‍ക്കാലത്തേക്ക് നിര്‍ത്തിയിരുന്നുവെങ്കിലും പ്രവര്‍ത്തികള്‍ തുടങ്ങേണ്ടതുകൊണ്ട് തൊഴില്‍ കാര്‍ഡുകള്‍ നല്‍കാന്‍ നിര്‍ബന്ധിതമായിരിക്കുകയാണെന്നാണ് അറിയുന്നത്. 2016 മാര്‍ച്ച് 31ന് മുമ്പ് അനുവദിച്ച കാര്‍ഡുകളാണ് അടുത്ത 5 വര്‍ഷക്കാലത്തേക്ക് പുതുക്കി നല്‍കുന്ന പ്രക്രിയ ഗ്രാമപഞ്ചായത്തുകളില്‍ നടന്നു വരുന്നത്.